മുംബയ്: ഉപയോക്താക്കളെ പിടിച്ചുനിറുത്താൻ പുതിയ മാർഗവുമായി വീഡിയോ സ്ട്രീമിംഗ് പ്ലാറ്റ്ഫോമായ നെറ്റ്ഫ്ലിക്സ്. സബ്‌സ്‌ക്രൈബ് ചെയ്ത ഉപയോക്താക്കളിൽ ആപ്പിന്റെ ഉപയോഗം വർദ്ധിപ്പിക്കുന്നതിനാണ് പുതിയ മാർഗം. നെറ്റ്ഫ്ലിക്സ് അയയ്ക്കുന്ന നോട്ടിഫിക്കേഷൻ ഉപയോക്താക്കൾ മറുപടി നല്‍കാത്തപക്ഷം കമ്പനി അത്തരം അക്കൗണ്ടുകൾ പ്ളാറ്റ്‌ഫോമിൽ നിന്ന് നീക്കം ചെയ്യുന്നതായിരിക്കും.
സബ്‌സ്‌ക്രൈബ് ചെയ്ത ഉപയോക്താക്കളുടെ മെമ്പർഷിപ്പ് പ്ലാൻ സംബന്ധിക്കുന്നതായിരിക്കും കമ്പനി അയക്കുന്ന നോട്ടിഫിക്കഷന്റെ ഉള്ളടക്കം. നോട്ടീസിന് നിശ്ചിതസമയത്തിനുള്ളിൽ മറുപടി നല്‍കിയിട്ടില്ലെങ്കിൽ തൊട്ടടുത്ത സെക്കന്റിൽ നെറ്റ്ഫ്ലിക്സ് അക്കൗണ്ട് കമ്പനി നീക്കം ചെയ്യും.
സസ്‌പെൻഡ് ചെയ്തതിനുശേഷം അക്കൗണ്ട് ഉടമയ്ക്ക് എളുപ്പത്തിൽ അക്കൗണ്ട് വീണ്ടും ആക്ടിവേഷൻ ചെയ്യാവുന്നതാണ്. മെമ്പർഷിപ്പ് എടുത്ത് ഒരുവർഷമായിട്ടും നെറ്റ്ഫ്ലിക്സ് ഉപയോഗിക്കാത്തവർക്കാണ് നോട്ടീസ് അയക്കുക.പുതിയ നടപടിക്കുശേഷം ഏതെങ്കിലും ഉപയോക്താവ് അവരുടെ അക്കൗണ്ട് പുനരാരംഭിക്കുകയാണെങ്കിൽ അവർക്ക് മുമ്പ് സജ്ജമാക്കിയ ക്രമീകരണങ്ങളും ഷോകളും തിരികെ ലഭിക്കുന്നതാണ്. നെറ്റ്ഫ്ലിക്സ് ഇന്ത്യയിൽ അവതരിപ്പിച്ച കാലം മുതൽ വ്യത്യസ്തമായ നിരവധി പ്ലാനുകളാണ് ഉപയോക്തക്കൾക്കായി കമ്പനി അവതരിപ്പിച്ചത്.
ഈ വർഷത്തെ ആദ്യ മൂന്ന് മാസങ്ങൾക്കുള്ളിൽ 1.6 കോടി പുതിയ ഉപയോക്താക്കളെ ലഭിച്ചതായി നെറ്റ്ഫ്ലിക്സ് അറിയിച്ചിരുന്നു. 2019 അവസാന മാസങ്ങളിലെ കണക്കുകളേക്കാൾ ഇരട്ടിയാണിത്. ലോക്ക് ഡൗൺ കാലയളവിൽ ജനങ്ങൾ വീട്ടിലിരിക്കുന്നതാണ് ഈ നേട്ടത്തിന് കാരണമായത്. ഉപയോക്താക്കൾ കൂടിയതോടു കൂടി നെറ്റ്ഫ്‌ലിക്സിന്റെ ഓഹരിവില 30 ശതമാനത്തിലേറെ ഉയരുകയും ചെയ്തു.