കിഴക്കമ്പലം:പള്ളിക്കര മനയ്ക്കക്കടവ് റോഡിൽ ഓട്ടയടയ്ക്കൽ മാത്രം. ബി.എം,ബി.സി ടാറിംഗിനു ഫണ്ട് അനുവദിച്ച റോഡിൽ കുഴിയടയ്ക്കൽ തുടങ്ങിയത് കണ്ണിൽ പൊടിയിടാനെന്ന് നാട്ടുകാർ. വർഷങ്ങളായി റോഡ് പൊട്ടിപ്പൊളിഞ്ഞ് കിടന്നിട്ടും ഇതു വരെ അ​റ്റകു​റ്റപ്പണിയ്ക്ക് നടപടി ഉണ്ടായില്ല. അടുത്തിടെ ബി.എം,ബി.സി ടാറിംഗ് പൂർത്തീകരിക്കുമെന്ന് പ്രഖ്യാപനം വന്നതിനു പിന്നാലെയാണ് അ​റ്റകു​റ്റപ്പണി നടത്താൻ തുടങ്ങിയത്. മഴയ്ക്ക് മുമ്പെ റോഡിന്റെ അ​റ്റകു​റ്റപ്പണി നടത്തുന്നതാണെന്നാണ് അധികൃതർ പറയുന്നത്. എന്നാൽ റോഡ് അ​റ്റകു​റ്റപ്പണിയ്ക്ക് നിലവാരമില്ലാത്ത സാധനങ്ങളാണ് ഉപയോഗിക്കുന്നതെന്ന് നാട്ടുകാർ ആരോപിച്ചു. പേരിനു ഓട്ടയടയ്ക്കൽ ജോലികൾ നടത്തി തടിയൂരാനാണ് കരാറുകാരന്റെ ശ്രമമെന്നാണ് നാട്ടുകാരുടെ പരാതി.

#അപകടം വർദ്ധിക്കുന്നു

ബി.എം,ബി.സി ടാറിംഗിനു മുന്നോടിയായി ശുദ്ധജല പൈപ്പ് മാ​റ്റുന്നതിനായി റോഡ് കുത്തിപ്പൊളിച്ചിട്ട് 7 മാസം പിന്നിട്ടിട്ടും തുടർ നടപടികൾ ഉണ്ടായിട്ടില്ല. നാല് കിലോമീ​റ്റർ മാത്രം വരുന്ന ദൂരത്തിൽ ഇരുവശങ്ങളിലും റോഡ് വെട്ടിപ്പൊളിച്ചതു മൂലം അപകടം വർദ്ധിക്കുകയാണ്.

#എങ്ങുമെത്താതെ നിർമ്മാണം

ബി.എം,ബി.സി ടാറിംഗിനു ഫണ്ട് അനുവദിച്ച് കാത്തിരിക്കാൻ തുടങ്ങിയിട്ട് വർഷങ്ങളായിട്ടും നിർമ്മാണം വൈകുന്നതിൽ നാട്ടുകാർ ആശങ്കയുണ്ട്. ഈ റോഡുകളുടെ വീതി വർദ്ധിപ്പിച്ച് ബസ് കാത്തിരിപ്പു കേന്ദ്രം, കലുങ്ക്, ഡ്രെയിനേജ് സംവിധാനങ്ങൾ ഉൾപ്പെടുത്തി റോഡ് നിർമ്മിക്കാനാണ് പദ്ധതിയിട്ടിരിക്കുന്നത്. മനയ്ക്കക്കടവ് കിഴക്കമ്പലം പട്ടിമ​റ്റം, പട്ടിമ​റ്റം പത്താംമൈൽ, പട്ടിമ​റ്റം നെല്ലാട് റോഡുകൾ ബി.എം,ബി.സി നിലവാരത്തിൽ ടാർ ചെയ്യുന്നതിനായി കിഫ്ബി 32.64 കോടി രൂപ അനുവദിച്ചിട്ടുണ്ടെങ്കിലും റോഡ് നിർമാണം എങ്ങുമെത്തിയിട്ടില്ല.