തൃക്കാക്കര: എസ്.എസ്.എൽ.സി പരീക്ഷ ഹാളിന് പുറത്ത് കർമ്മ നിരതരായി ആശാ വർക്കർമാർ. കാക്കനാട് മാർ അത്തനേഷ്യസ് സ്കൂളിൽ എത്തുന്ന കുട്ടികൾക്ക് കൈകൾ കഴുകുന്നതിനുള്ള സൗകര്യവും സാനിറ്റൈസറും ഒരുക്കി. കുട്ടികളുടെ ശരീര ഊഷ്മാവ് പരിശോധിച്ചു. പരീക്ഷ ഹാളിലും സാമൂഹിക അകലം പാലിക്കുന്നുണ്ടോയെന്ന് പരിശോധിക്കുകയും ചെയ്തു. പരീക്ഷ കഴിഞ്ഞും ഇതേ നടപടി തുടർന്നു. വാർഡിലെ മാതൃ-ശിശു സംരക്ഷണം ഉറപ്പാക്കുക, ഗർഭിണികളുടെ കണക്കെടുപ്പ് അവർക്കു സേവനങ്ങളെത്തിക്കൽ, കുഞ്ഞുങ്ങളുടെ കൃത്യമായ കുത്തിവയ്പ്,കിടപ്പുരോഗികൾ, പാലിയേറ്റീവ്, ജീവിതശൈലി രോഗത്തിന്റെ കണക്കെടുപ്പ്,കൊവിഡ് ആരോഗ്യ റിപ്പോർട്ട് തയാറാക്കൽ എന്നിവക്ക് പുറമെയാണ് എസ്. എസ്. എൽ.സി പരീക്ഷക്കെത്തുന്ന കുട്ടികളുടെ സുരക്ഷാ ഉറപ്പാക്കുന്നതിനുള്ള ചുമതല ഇവർ വഹിക്കുന്നത്.

# കൊവിഡ് പ്രതിരോധം

വിദേശത്തു നിന്നും അന്യസംസ്ഥാനത്തു നിന്നും എത്തുന്നവരുടെ വിവര ശേഖരണം, നിരീക്ഷണത്തിലുള്ള വീടുകളിൽ നേരിട്ടു സന്ദർശനം എന്നിവയ്ക്ക് പുറമെ ദിവസം രണ്ട് തവണ ആശാ വർക്കർമാർ നിരീക്ഷണത്തിലുള്ളവരെ വിളിക്കും. രോഗലക്ഷണങ്ങളുണ്ടോയെന്ന് അന്വേഷിക്കും.നിരീക്ഷണത്തിൽ കഴിയുന്നവർ പുറത്തിറങ്ങിയാൽ ആ വിവരങ്ങൾ ബന്ധപ്പെട്ടവർക്കു കൈമാറും. അവർക്ക് സമൂഹ അടുക്കളയിൽ നിന്നു ഭക്ഷണവും ഭക്ഷ്യ കിറ്റുകളുമെത്തിക്കുന്നു. ആവശ്യമുള്ളവർക്കു മരുന്നുകൾ ലഭ്യമാക്കുന്നു. മാനസിക സമ്മർദ്ദമുള്ളവർക്കു കൗൺസ ലിംഗ് ലഭ്യമാക്കുന്നു. മാസ്ക് നിർമാണം, സാനിറ്റൈസർ നിർമാണം എന്നിവയിലും ആശാ വർക്കർമാർ ഏർപ്പെടുന്നുണ്ട്.അങ്ങനെ കൊവിഡ് പ്രതിരോധത്തിൽ താഴെത്തട്ടിലുള്ളവർക്കും ആശാ വർക്കർമാർ സഹായം എത്തിക്കുന്നു.