യൊടുപുഴ: തൊടുപുഴ കേന്ദ്രീകരിച്ച് നാലാമത്തെ കോവിഡ് കെയർ സെന്റർ വട്ടക്കളം ടൂറിസ്റ്റ് ഹോമിൽ പ്രവർത്തനം ആരംഭിച്ചു. വനിതകൾക്കുവേണ്ടി മാത്രമാണ് ഇവിടെ ക്വാറന്റൈൻ സജ്ജീകരണം ഒരുക്കിയിരിക്കുന്നത്. അന്യ സംസ്ഥാനത്തുനിന്ന് കൂടുതൽ ആളുകൾ എത്തുന്നത് കണക്കിലെടുത്ത് കൂടുതൽ കോവിഡ് കെയർ സെന്ററുകൾ തുടങ്ങേണ്ടി വരുമെന്ന് അധികൃതർ അറിയിച്ചു. അതാത് തദ്ദേശ സ്വയംഭരണ സ്ഥാപനങ്ങൾക്കാണ് നിരീക്ഷണത്തിലുള്ളവരുടെ ഭക്ഷണചുമതല. തൊടുപുഴയിൽ മുനിസിപ്പാലിറ്റി ഭക്ഷണത്തിനുള്ള സജ്ജീകരണം ഒരുക്കിയിട്ടുണ്ട്. അന്യ സംസ്ഥാനത്തുനിന്നും വിദേശത്തുനിന്നും കൂടുതൽ ആളുകൾ വരുന്നത് കണക്കിലെടുത്ത് തൊടുപുഴ ബ്ലോക്ക് പഞ്ചായത്ത് ഹാളിൽ വെച്ച് ബ്ലോക്ക് ഏകോപന സമിതി അടിയന്തിര യോഗം ചേർന്നു. ബ്ലോക്ക് ഏകോപന സമിതി ചെയർമാൻ സിനോജ് എരിച്ചിരിക്കാട്ട്, ഇളംദേശം ബ്ലോക്ക് പ്രസിഡന്റ് മാർട്ടിൻ മാത്യു, മുനിസിപ്പൽ ചെയർപേഴ്‌സൺ സിസിലി ജോസ്, തൊടുപുഴ ബ്ലോക്ക് മെഡിക്കൽ ഓഫീസർ ഡോരേഖ ശ്രീധർ, ഇളംദേശം ബ്ലോക്ക് ഏകോപനസമിതി കൺവീനർ ഡോ.കെ.സി.ചാക്കോ തുടങ്ങിയവർ പങ്കെടുത്തു.