തൊടുപുഴ: കെപിസിസി ആഹ്വാനം ചെയ്തിരിക്കുന്ന കുത്തിയിരുപ്പ് സമരം നാളെ രാവിലെ 10 മുതൽ 12 വരെ എല്ലാ പഞ്ചായത്തുകളിലെയും ഏതെങ്കിലും ഒരു സർക്കാർ ആഫീസിനുമുമ്പിൽ മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ നടത്തുമെന്ന് ഡി.സി.സി. പ്രസിഡന്റ് അഡ്വ.ഇബ്രാഹിംകുട്ടി കല്ലാർ അറിയിച്ചു. ജില്ലയിലെ 59 കേന്ദ്രങ്ങളിൽ കൊവിഡ് 19 സർക്കാർ മാനദണ്ഡങ്ങൾ പാലിച്ചുകൊണ്ട് 5 പേർ മാത്രം സമരം നടത്തും. കൊവിഡ്19 ന്റെ പശ്ചാത്തലത്തിൽ കടുത്ത ദാരിദ്ര്യവും പട്ടിണിയും അനുഭവിക്കുന്ന വിഭാഗങ്ങൾക്ക് സഹായം എത്തിക്കാൻ ഇനിയും താമസിക്കരുത്. കൃഷിക്കാരുടെ ജീവിതം തന്നെ വഴിമുട്ടി നിൽക്കുകയാണ്. മിക്കവരും സ്വകാര്യ, ധനകാര്യസ്ഥാപനങ്ങൾ ഉൾപ്പെടെയുള്ള ബാങ്കുകളിൽനിന്നും വായ്പയെടുത്താണ് കൃഷിയിറക്കിയത്. പലരും ജപ്തി ഭീഷണി നേരിടുന്നവരുമാണ്. സംസ്ഥാനസർക്കാർ പ്രഖ്യാപിച്ച മൊറട്ടോറിയംകൊണ്ട് ഒരു പ്രയോജനവും കർഷകർക്കില്ല. ഓട്ടോ, ടാക്‌സി, തൊഴിലാളികളുടെ കുടുംബങ്ങൾക്ക് അടിയന്തിരമായി 10000 രൂപ വീതം സഹായം നൽകണമെന്നും ഡി.സി.സി. പ്രസിഡന്റ് ആവശ്യപ്പെട്ടു.