തൊടുപുഴ: തൊടുപുഴയാറിൽ കുളിക്കാനിറങ്ങിയ തമിഴ്നാട് സ്വദേശിയെ ഒഴുക്കിൽപ്പെട്ട് കാണാതായി. കെട്ടിടനിർമാണ തൊഴിലാളിയായ തമിഴ്നാട് നാഗപട്ടണം സ്വദേശി ഷൺമുഖം സുന്ദരത്തെയാണ് (29) കാണാതായത്. ഇന്നലെ ഉച്ചയ്ക്ക് 12.45ന് വെങ്ങല്ലൂർ ചാലിക്കടവിലാണ് സംഭവം. സുഹൃത്തുക്കളായ മറ്റ് അന്യസംസ്ഥാന തൊഴിലാളികൾക്കൊപ്പം കുളിക്കവെ സമീപത്തെ ഒരു പാറയ്ക്കരികിലേക്ക് നീന്തുന്നതിനിടെ ഒഴുക്കിൽപ്പെടുകയായിരുന്നു. തുടർന്ന് തൊടുപുഴയിലെയും കല്ലൂ‌ർക്കാട്ടെയും ഫയർഫോഴ്സ് യൂണിറ്റുകൾ സ്കൂബാ ഡൈവേഴ്സിന്റെ സഹായത്തോടെ വൈകിട്ട് വരെ തിരച്ചിൽ നടത്തിയെങ്കിലും കണ്ടെത്താനായില്ല. പുഴയിൽ നല്ല അടിയൊഴുക്കുണ്ടായിരുന്നതും വൈകിട്ട് മഴ പെയ്തതോടെ വെള്ളം കലങ്ങിയതും തിരച്ചിലിനെ പ്രതികൂലമായി ബാധിച്ചു. തുടർന്ന് ആറ് മണിയോടെ തിരച്ചിൽ അവസാനിപ്പിക്കുകയായിരുന്നു. ഇന്ന് രാവിലെ എട്ടിന് തിരച്ചിൽ പുനരാരംഭിക്കും.