ഇടുക്കി : ജൈവവൈവിധ്യ സംരക്ഷണ രംഗത്തെ മികച്ച സംഭാവനകൾക്ക് വനംവന്യജീവി വകുപ്പ് വനമിത്ര അവാർഡ് നൽകുന്നു. കാവുകൾ , ഔഷധച്ചെടികൾ, കാർഷിക ജൈവവൈവിധ്യം മുതലായവയുടെ സംരക്ഷണത്തിലൂടെ പ്രാദേശിക ജൈവവൈവിധ്യം പരിരക്ഷിക്കുന്നതിന് നടത്തിയ പ്രവർത്തനങ്ങളാണ് അവാർഡിന് പരിഗണിക്കുന്നത്. വ്യക്തികൾക്കും സന്നദ്ധ സംഘടനകൾക്കും വിദ്യാഭ്യാസ സ്ഥാപനങ്ങൾക്കും കർഷകർക്കും അവാർഡിന് അപേക്ഷിക്കാം. ജില്ലയിൽ ഒരു അവാർഡാണ് നൽകുന്നത്. അപേക്ഷകൾ അസിസ്റ്റന്റ് ഫോറസ്റ്റ് കൺസർവേറ്റർ, സോഷ്യൽ ഫോറസ്ട്രി ഡിവിഷൻ, ഇടുക്കി, സഹ്യസാനു ഫോറസ്റ്റ് കോംപ്ലക്‌സ്, വെള്ളാപ്പാറ, പൈനാവ് പി.ഒ 685603 എന്ന വിലാസത്തിൽ ജൂൺ 30ന് മുമ്പായി സമർപ്പിക്കണം. അപേക്ഷയോടൊപ്പം അവാർഡിനുള്ള അർഹത തെളിയിക്കുന്ന വിവരങ്ങൾ അടങ്ങിയ ഒരു കുറിപ്പും തെളിവിലേക്കായി പ്രസക്തമായ രേഖകൾ, ഫോട്ടോഗ്രാഫുകൾ എന്നിവയും ഉൾപ്പെടുത്തണം. കൂടുതൽ വിവരങ്ങൾക്ക് ഫോൺ 04862 232505, 9447979142.