കണ്ണൂർ: ജില്ലയിലൊരുക്കിയ സമൂഹ അടുക്കളകൾ വഴി ഒരു ലക്ഷം പേർക്ക് ഭക്ഷണം നൽകാനുള്ള പദ്ധതിയുമായി ശാന്തിഗിരി ആശ്രമം കണ്ണൂർ ഏരിയ കമ്മിറ്റി. കമ്യൂണിറ്റി കിച്ചണുകളിലേക്ക് ആവശ്യമായ ഭക്ഷ്യധാന്യങ്ങളും പച്ചക്കറിയും വിതരണം ചെയ്തു. കണ്ണൂർ, തളിപ്പറമ്പ്, പയ്യന്നൂർ ഭാഗങ്ങളിലെ സമൂഹ അടുക്കളകളിലേക്ക് ഒരു ദിവസത്തെ ഭക്ഷണത്തിനാവശ്യമായ ഭക്ഷ്യധാന്യങ്ങളാണ് ഇവർ വിതരണം ചെയ്തത്. ഭക്ഷ്യധാന്യം ശാന്തിഗിരി ആശ്രമം ഗവേണിംഗ് കമ്മിറ്റി അംഗം മനോജ് മാത്തനിൽ നിന്നും ജില്ലാ പഞ്ചായത്ത് പ്രസിഡന്റ് കെ.വി സുമേഷ് ഏറ്റുവാങ്ങി. ശാന്തിഗിരി ആശ്രമത്തിന്റെ എല്ലാ ആഘോഷപരിപാടികളും ഉപേക്ഷിച്ചാണ് ലോക്ക് ഡൗൺ കാലത്ത് കേരളത്തിലെ സാമൂഹ്യ അടുക്കളകളെ ആശ്രയിച്ച് കഴിയുന്ന ഒരു ലക്ഷം പേർക്ക് ഭക്ഷണം നൽകാൻ തീരുമാനിച്ചതെന്ന് മനോജ് മാത്തൻ പറഞ്ഞു. ജില്ലാ പഞ്ചായത്ത് അംഗം അജിത് മാട്ടൂൽ, സെക്രട്ടറി വി. ചന്ദ്രൻ, ശാന്തിഗിരി ആശ്രമം ഏരിയ കമ്മിറ്റി അംഗങ്ങളായ എ. രാജീവൻ, സി. പ്രശാന്തൻ, കെ.പി ഷെറിൻ രാജ് തുടങ്ങിയവർ സംബന്ധിച്ചു.