കാസർകോട്: കൊച്ചി-മംഗളൂരു ഗെയിൽ വാതക പൈപ്പ് ലൈൻ പദ്ധതി ജൂൺ ആദ്യവാരം കമ്മിഷൻ ചെയ്യും. കൊച്ചി മുതൽ മംഗളൂരു വരെ 444 കിലോമീറ്റർ പൈപ്പ് ലൈൻ പൂർണ്ണമായും പ്രവർത്തന സജ്ജമായി. ഇനി ചന്ദ്രഗിരി പുഴയിൽ പൈപ്പ് ലൈൻ സ്ഥാപിക്കേണ്ട ജോലികൾ മാത്രമാണ് ബാക്കിയുള്ളത്. കൊവിഡ് നിയന്ത്രണങ്ങൾക്കിടയിലും പൂർണ്ണമായും സുരക്ഷാ മാനദണ്ഡങ്ങൾ പാലിച്ച് നിർമ്മാണ പ്രവർത്തനം അതിവേഗം നടന്നുവരികയാണ്.

ഈ പ്രവൃത്തി ഈ മാസം തന്നെ പൂർത്തിയാകും. അദാനി ഗ്രൂപ്പ് ഏറ്റെടുത്തിട്ടുള്ള സിറ്റി ഗ്യാസ് പദ്ധതി ഈ മാസം ഒടുവിൽ തുടങ്ങിയേക്കും. അമ്പലത്തറയിൽ പൊലീസ് സ്റ്റേഷന് ഒരു കിലോമീറ്റർ അകലെ റോഡരികിലായി അദാനി ഗ്രൂപ്പ് വാങ്ങിയ അമ്പത് സെന്റ് ഭൂമിയിൽ സ്റ്റേഷന്റെ നിർമ്മാണം പൂർത്തിയായി. ഗാർഹിക ഉപയോഗത്തിന് ഉൾപ്പെടെ പാചകവാതകം പൈപ്പ് ലൈൻ വഴി നൽകുന്നത് ഇവിടെ നിന്നായിരിക്കും. കോട്ടപ്പാറയിൽ മംഗളൂരു ഭാഗത്തേക്കുള്ള പൈപ്പ് അടച്ചു കൊണ്ടായിരിക്കും അമ്പലത്തറയിലെ സ്റ്റേഷൻ പ്രവർത്തന സജ്ജമാക്കുന്നത്. ഇപ്പോൾ കൊച്ചിയിൽ നിന്നും പൈപ്പിലൂടെ ഇങ്ങോട്ടേക്ക് പാചകവാതകം എത്തി തുടങ്ങിയിട്ടുണ്ട്.

പൈപ് ലൈൻ വരുമ്പോൾ

കൊച്ചി മുതൽ മംഗളൂരു വരെ പദ്ധതി കമ്മിഷൻ ചെയ്യുന്നതോടെ കൊച്ചിയിലെ മുഖ്യ ടെർമിനലിൽ നിന്നും കേരളം, തമിഴ്നാട്, കർണാടകം എന്നിവിടങ്ങളിലെ വ്യവസായങ്ങൾക്ക് ആവശ്യമായ വാതക ഇന്ധനം എൽ. എൻ. ജി പൈപ്പുകൾ വഴി വിതരണം ചെയ്യാൻ കഴിയും .ഇതേ പൈപ്പ് ലൈൻ വഴി വീടുകളിലേക്കും പ്രകൃതി വാതകം എത്തിക്കും.

കരാർ 2007ൽ

പൈപ്പ് ലൈൻ പദ്ധതിക്കായി 2007 ലാണ് കേരളം ഗെയിലുമായി കരാറിൽ ഏർപ്പെട്ടത്. 2010 ൽ പുതു വൈപ്പിനിൽ നിന്നും അമ്പലമുകളിലേക്കുള്ള ആദ്യ പൈപ്പ് ലൈൻ പദ്ധതി ആരംഭിച്ച് 2013 ൽ തന്നെ കമ്മിഷൻ ചെയ്തു.2012 ലാണ് പദ്ധതിയുടെ രണ്ടാം ഘട്ടം തുടക്കമിടുന്നത്. കൊച്ചി -മംഗളൂരു, കൊച്ചി- കോയമ്പത്തൂർ -ബംഗളൂരു പദ്ധതികൾക്ക് കേന്ദ്രത്തിന്റെ അനുമതിയും ലഭിച്ചു. എറണാകുളം, തൃശൂർ, പാലക്കാട്, കോഴിക്കോട്, മലപ്പുറം, കണ്ണൂർ കാസർകോട് ഇനീ ജില്ലകളിലൂടെയാണ് പൈപ്പ്‌ലൈൻ കടന്നു പോകുന്നത്. കഴിഞ്ഞ സർക്കാർ ഭൂമി ഏറ്റെടുത്തു നൽകാൻ വിമുഖത കാണിച്ചതോടെ 2014 ആഗസ്റ്റിൽ മുഴുവൻ കരാറുകളും ഉപേക്ഷിച്ചു ഗെയിൽ കേരളം വിട്ടിരുന്നു. പിന്നീട് എൽ .ഡി. എഫ് സർക്കാരിന്റെ കാലത്താണ് പദ്ധതി വീണ്ടും തുടങ്ങാൻ അനുമതി നൽകിയത്.

സ്ഥലം ഏറ്റടുത്തത് 380 കി.മി

ഭൂമി ഏറ്റെടുത്തതിന് നൽകിയത് 300 കോടി

വിള നാശനഷ്ടം 250കോടി

ഭൂമി(ഉപയോഗാവകാശം) 33.33 കോടി

നെൽവയലുകൾക്ക് സെന്റിന് 3761

പടം ..കാഞ്ഞങ്ങാട് അമ്പലത്തറയിൽ അദാനി ഗ്രൂപ്പ് പണി പൂർത്തിയാക്കിയ ഗ്യാസ് സെന്റർ