കണ്ണൂർ: ജില്ലയിൽ കൊവിഡ് 19 ബാധയെ തുടർന്ന് ആശുപത്രികളിൽ ചികിത്സയിലായിരുന്ന 10 പേർക്കു കൂടി രോഗമുക്തി. കണ്ണൂർ ഗവ: മെഡിക്കൽ കോളേജിൽ ചികിത്സയിലായിരുന്ന എരിപുരം സ്വദേശി, അഞ്ചരക്കണ്ടി ജില്ലാ കോവിഡ് ചികിത്സാ കേന്ദ്രത്തിൽ ചികിത്സയിലായിരുന്ന മൂരിയാട് സ്വദേശികളായ 4 പേർ, ചെറുവാഞ്ചേരി, പെരളശ്ശേരി, പത്തായക്കുന്ന്, പെരിങ്ങത്തൂർ, മൊകേരി സ്വദേശികൾ എന്നിവരാണ് ഇന്നലെ ആശുപത്രി വിട്ടത്.
ഇതോടെ ജില്ലയിൽ കൊവിഡ് സ്ഥിരീകരിച്ച 118 പേരിൽ 113 പേർ രോഗം ഭേദമായി ആശുപത്രി വിട്ടു. ബാക്കി അഞ്ചു പേർ വിവിധ ആശുപത്രികളിൽ ചികിത്സയിലാണ്. അഞ്ചരക്കണ്ടി ജില്ലാ കൊവിഡ് ചികിത്സാ കേന്ദ്രത്തിൽ നാലു പേരും കണ്ണൂർ ഗവ: മെഡിക്കൽ കോളേജിൽ ഒരാളുമാണ് നിലവിൽ ചികിത്സയിലുള്ളത്.
ജില്ലയിൽ ആകെ 197 പേർ നിലവിൽ നിരീക്ഷണത്തിലുണ്ട്. 33 പേർ കണ്ണൂർ ഗവ. മെഡിക്കൽ കോളേജിലും രണ്ടു പേർ തലശ്ശേരി ജനറൽ ആശുപത്രിയിലും 15 പേർ അഞ്ചരക്കണ്ടി ജില്ലാ കൊവിഡ് ചികിത്സാ കേന്ദ്രത്തിലും 147 പേർ വീടുകളിലുമാണുള്ളത്.
ഇതുവരെയായി ജില്ലയിൽ നിന്നും 4252 സാമ്പിളുകൾ പരിശോധനയ്ക്കയച്ചതിൽ 4139 എണ്ണത്തിന്റെ ഫലം ലഭ്യമായി. 113 എണ്ണത്തിന്റെ ഫലം ലഭിക്കാനുണ്ട്.