കണ്ണൂർ: മേയ് നാലു മുതൽ മൂന്ന് അതിർത്തികളിലൂടെ ഇതര സംസ്ഥാനങ്ങളിൽ നിന്ന് കണ്ണൂർ ജില്ലയിലെത്തിയത് 3900ത്തിലേറെ പേർ . ഇവരിൽ സ്‌ക്രീനിംഗിൽ രോഗലക്ഷണങ്ങൾ കണ്ടെത്തിയ ഒരാളെ ആശുപത്രിയിലും റെഡ് ജില്ലകളിൽ നിന്നെത്തിയ 851 പേരെ വിവിധ കൊവിഡ് കെയർ സെന്ററുകളിലും 3055 പേരെ വീടുകളിലും നിരീക്ഷണത്തിലാക്കി. ഇതിനു പുറമെ വിവിധ വിമാനത്താവളങ്ങൾ വഴി 36 പേർ ഗൾഫ് നാടുകളിൽ നിന്ന് ജില്ലയിലെത്തിയിട്ടുണ്ട്.

ഇവരിൽ രണ്ടു പേർ ആശുപത്രിയിലും 12 കൊവിഡ് കെയർ സെന്ററുകളിലും ബാക്കിയുള്ളവർ വീടുകളിലുമാണുള്ളത്. ഇതിനു പുറമെ നിലവിൽ മൂന്നു പേർ കണ്ണൂർ ജില്ലാ ആശുപത്രിയിലും 30 പേർ കണ്ണൂർ ഗവ. മെഡിക്കൽ കോളേജിലും നാലു പേർ തലശ്ശേരി ജനറൽ ആശുപത്രിയിലും നാലു പേർ അഞ്ചരക്കണ്ടി ജില്ലാ കൊവിഡ് 19 ചികിത്സാ കേന്ദ്രത്തിലും 409 പേർ വീടുകളിലുമായി ആകെ 450 പേർ ജില്ലയിൽ നിരീക്ഷണത്തിലുണ്ട്.
ജില്ലയിൽ ഇതുവരെയായി 118 പോസിറ്റീവ് കേസുകൾ റിപ്പോർട്ട് ചെയ്യപ്പെട്ടതിൽ 115 പേർ രോഗം ഭേദമായി ആശുപത്രി വിട്ടു. അഞ്ചരക്കണ്ടി ജില്ലാ കൊവിഡ്19 ചികിത്സാ കേന്ദ്രത്തിൽ ചികിത്സയിലായിരുന്ന കോട്ടയം മലബാർ, കൂത്തുപറമ്പ് സ്വദേശികൾ ഇന്നലെയാണ് രോഗം ഭേദമായി ആശുപത്രി വിട്ടത്. അഞ്ചരക്കണ്ടിയിൽ രണ്ടും കണ്ണൂർ ഗവ: മെഡിക്കൽ കോളേജിൽ ഒരാളുമാണ് ഇനി ചികിത്സയിലുള്ളത്.