ചെറുവത്തൂർ: വാടക ക്വാർട്ടേഴ്സിൽ തെയ്യം കലാകാരനെ ആക്രമിച്ചു കെട്ടിയിട്ടു വായിൽ ചകിരി തിരുകി. തൃക്കരിപ്പൂർ ഒളവറ മാവിലങ്ങാട് കോളനിയിലെ വി. സുശീൽകുമാറി (22)നെ പരിക്കുകളോടെ ചെറുവത്തൂരിലെ ആശുപത്രിയിൽ പ്രവേശിപ്പിച്ചു. ആക്രമണ ദൃശ്യം മൊബൈലിൽ പകർത്തിയെന്നും സുശീൽകുമാർ ചന്തേര പൊലീസിന് മൊഴി നൽകി.

ബൈക്കിലും കാറിലുമായി എത്തിയ പത്തോളം വരുന്ന സംഘം നീലേശ്വരം കൊട്രച്ചാൽ കോളനിയിലെ വാടക ക്വാർട്ടേഴ്സിൽ എത്തിയ തന്നെ ആക്രമിക്കുകയായിരുന്നുവെന്ന് സുശീൽകുമാർ പറയുന്നു. കൊട്രച്ചാലിലെ വാടക വീട്ടിൽ തന്നെ വിളിച്ചുവരുത്തി കസേരയിൽ കൈയും കാലും കെട്ടിയിട്ടു വായിൽ ചകിരി തിരുകി മരക്കട്ട കൊണ്ട് ഇടിക്കുകയും വൈകുന്നേരം നാലോടെ കാറിൽ കയറ്റി തൃക്കരിപ്പൂർ ഒളവറയിലെ വീട്ടിൽ തള്ളുകയായിരുന്നുവത്രെ. മൊബൈൽ ഫോൺ സംഘം പിടിച്ചെടുക്കുകയും ചെയ്തുവെന്ന് പരാതിയിൽ പറയുന്നു. സംഭവത്തിൽ പൊലീസ് അന്വേഷണം ഊർജിതമാക്കി.

അതിനിടെ നീലേശ്വരം സ്വദേശിനിയായ ഒരു യുവതി സുശീൽകുമാർ തന്നെ മാനഭംഗപ്പെടുത്താൻ ശ്രമിച്ചതായി ആരോപിച്ച് നീലേശ്വരം പൊലീസിൽ പരാതി നല്കി. ഇക്കാര്യത്തിലും കേസെടുത്ത് അന്വേഷണം നടത്തുന്നുണ്ട്.