കണ്ണൂർ: കൊവിഡ് നിയമ ലംഘകരെ കൈയോടെ പിടികൂടാൻ പയ്യന്നൂർ നഗരത്തിന്റെ വിവിധ കേന്ദ്രങ്ങളിൽ നിരീക്ഷണ കാമറകൾ സ്ഥാപിച്ചു. മാസ്‌ക് ധരിക്കാതെ പൊതുസ്ഥലങ്ങളിൽ എത്തുന്നവരേയും, സാമൂഹിക അകലം പാലിക്കാതെ കൂട്ടം കൂടുന്നവരേയും കാമറ നിരീക്ഷിക്കും. ഇത്തരത്തിൽ കാമറയിൽ പതിയുന്നവരുടെ വിവരങ്ങൾ പൊലീസ് പട്രോളിംഗ് സംഘങ്ങൾക്ക് കൈമാറും. തുടർന്ന് നിയമ ലംഘകരിൽ നിന്ന് പിഴയും ഈടാക്കും. പയ്യന്നൂർ വ്യാപാരികൾ വാട്ട്‌സ് ആപ്പ് കൂട്ടായ്മയുടെ സഹകരണത്തോടെയാണ് പദ്ധതി നടപ്പിലാക്കുന്നത്.

ലോക്ക് ഡൗൺ കാലത്ത് പൊതുജനങ്ങളിൽ കൊവിഡ് വൈറസിന്റെ വ്യാപനത്തെ കുറിച്ചും സാമൂഹിക അകലത്തെകുറിച്ച് ബോധവത്ക്കരണം നടത്തുന്നതിനും പൊതു സ്ഥലങ്ങളിലെത്തുന്ന ജനങ്ങളെ വീക്ഷിക്കുകയുമാണ് പദ്ധതിയിലൂടെ ലക്ഷ്യം വെക്കുന്നത്.
പയ്യന്നൂർ പൊലീസിനാണ് ഇതിന്റെ മേൽനോട്ട ചുമതല. ജില്ലാ പൊലീസ് മേധാവി ജി.എച്ച് യതീഷ് ചന്ദ്രയുടെ നിർദേശപ്രകാരം തളിപ്പറമ്പ് ഡിവൈ.എസ്.പി ടി.കെ രത്‌നകുമാറാണ് ഇതിന്റെ മേൽനോട്ടം വഹിക്കുന്നത്. ഈ പദ്ധതി വരുംദിവസങ്ങളിൽ ജില്ലയിലുടനീളം വ്യാപിപ്പിക്കും. മിനി കൺട്രോൾ റൂമിന്റെ ഉദ്ഘാടനം തളിപ്പറമ്പ് ഡിവൈ..എസ്.പി പെരുമ്പ മാർക്കറ്റിൽ നിർവ്വഹിച്ചു. സി.ഐ എ.വി ജോൺ , കെ. നാസിം, വി.പി സുമിത്രൻ, കെ. വിജയൻ തുടങ്ങിയവർ ചടങ്ങിൽ സംബന്ധിച്ചു.