കണ്ണൂർ: ജില്ലയിൽ നാലു പേർക്കു കൂടി ഇന്നലെ കൊവിഡ് ബാധ സ്ഥിരീകരിച്ചതായി ജില്ലാ കളക്ടർ അറിയിച്ചു. നാലു പേരും ഇതര സംസ്ഥാനങ്ങളിൽ നിന്നെത്തിയവരാണ്. മേയ് ആറിന് ചെന്നൈയിൽ നിന്നെത്തിയ പയ്യന്നൂർ സ്വദേശി 45കാരി, ഗുജറാത്തിൽ നിന്നെത്തിയ പെരിങ്ങത്തൂർ സ്വദേശി 67കാരൻ, ഒൻപതിന് മുംബൈയിൽ നിന്നെത്തിയ ചൊക്ളിയിൽ താമസിക്കുന്ന മൊകേരി സ്വദേശി 59കാരൻ, മെയ് 16ന് മുംബൈയിൽ നിന്നെത്തിയ കോട്ടയം മലബാർ സ്വദേശി 70 കാരൻ എന്നിവരാണ് പുതുതായി കൊവിഡ് ബാധ സ്ഥിരീകരിച്ചവർ.
ഇതോടെ ജില്ലയിൽ കോവിഡ് ബാധിതരുടെ എണ്ണം 138 ആയി. ഇതിൽ 119 പേർ രോഗം ഭേദമായി ആശുപത്രി വിട്ടു.
നിലവിൽ 9384 പേരാണ് ജില്ലയിൽ നിരീക്ഷണത്തിലുള്ളത്. ഇതുവരെയായി ജില്ലയിൽ നിന്നും 5220 സാമ്പിളുകൾ പരിശോധനയ്ക്കയച്ചതിൽ 5038 എണ്ണത്തിന്റെ ഫലം ലഭ്യമായി. 4778 എണ്ണത്തിന്റെ ഫലം നെഗറ്റീവാണ്. 182 എണ്ണത്തിന്റെ ഫലം ലഭിക്കാനുണ്ട്.