സ്പ്രിംഗ്ഫീൽഡ്: കൊവിഡ് 19 വൈറസ് വ്യാപന കാലത്തും സുന്ദരികളും സുന്ദരൻമാരുമാകാൻ ഇറങ്ങി പുറപ്പെട്ടവർക്ക് എട്ടിന്റെ പണി കൊടുത്ത് രണ്ട് ബാർബർമാർ. കൊവിഡ് വൈറസ് ബാധിതരായിട്ടും ജോലി ചെയ്ത ഇവരിലൂടെ 140 പേർക്ക് വൈറസ് സ്ഥിരീകരിച്ചു. അമേരിക്കൻ ഐക്യനാടുകളിലെ സംസ്ഥാനമായ ഇല്ലിനോയിസിന്റെ തലസ്ഥാനമായ സ്പ്രിംഗ്ഫീൽഡിലാണ് സംഭവം. കൗണ്ടി ഹെൽത്ത് ഡിപ്പാർട്ടുമെന്റാണ് ഇക്കാര്യം സ്ഥിരീകരിച്ചത്.

മെയ് 12 മുതൽ 20 വരെ വൈറസിന്റെ ലക്ഷണങ്ങൾ കണ്ടുതുടങ്ങിയ ആദ്യ ജീവനക്കാരിൽനിന്നും 84 പേർക്കും മെയ് 16 മുതൽ 20 വരെ ജോലി ചെയ്ത മറ്റൊരു ജീവനക്കാരനുമായി ഇടപഴകിയ 56 പേർക്കും ഉൾപ്പെടെ 140 പേർക്കാണ് ഹെയർ സലൂണിൽനിന്നും കൊവിഡ് രോഗം പകർന്നത്.

ആദ്യം രോഗം കണ്ടെത്തിയയാൾ എട്ട് ദിവസം വൈറസ് ലക്ഷണങ്ങൾ കണ്ടെത്തിയിട്ടും ജോലിയിൽ നിന്നും വിട്ടുനിൽക്കാത്തതാണ് കാര്യങ്ങൾ ഗുരുതരാവസ്ഥയിൽ എത്തിച്ചത്. നിയന്ത്രണങ്ങളിൽ അയവുവരുത്തിയതോടെയാണ് ഹെയർ സലൂണുകൾ തുറന്നു പ്രവർത്തിക്കാനാരംഭിച്ചത്.

സംസ്ഥാനത്തെ ആറാമത്തെ ജനത്തിരക്കേറിയ പട്ടണമായ സ്പ്രിംഗ്ഫീൽഡിൽ 1,16,250 പേരാണ് താമസിക്കുന്നത്. 1810 ൽ യൂറോപ്പിൽ നിന്നുള്ള കുടിയേറ്റക്കാർ താമസമാക്കിയ പട്ടണമാണ് ഇന്നത്തെ സ്പ്രിംഗ്ഫീൽഡ്. 1837 മുതൽ 1861 വരെ മുൻ അമേരിക്കൻ പ്രസിഡന്റ് എബ്രഹാം ലിങ്കണും ഇവിടെ താമസിച്ചിരുന്നു.