കൽപ്പറ്റ: മാനന്തവാടി നഗരസഭ പരിധിയിൽ അമ്പത്തിരണ്ട്കാരന് കൊവിഡ് സ്ഥിരീകരിച്ച സാഹചര്യത്തിൽ രോഗബാധിതൻ സമ്പർക്കം പുലർത്തിയ പ്രദേശങ്ങൾ അടച്ചിടും. ഇയാൾ സന്ദർശിച്ചിട്ടുളള നഗരസഭകളിലെയും പഞ്ചായത്തുകളിലെയും വാർഡുകളും കോളനികളുമാണ് കൊവിഡ് കണ്ടൈൻമെന്റുകളായി ജില്ലാ ഭരണകൂടം പ്രഖ്യാപിച്ചത്. മാനന്തവാടി നഗരസഭയിലെ 7,8,9,10, 21, 22 ടൗൺ ഏരിയ, 25, 26, 27 വാർഡുകളും, തിരുനെല്ലി ഗ്രാമപഞ്ചായത്തിലെ എല്ലാ വാർഡുകളും എടവക ഗ്രാമപഞ്ചായത്തിലെ 12, 14, 16 വാർഡുകളും, വെളളമുണ്ട ഗ്രാമപഞ്ചായത്തിലെ 9, 10, 11, 12 വാർഡുകളും, മീനങ്ങാടി ഗ്രാമപഞ്ചായത്തിലെ 8, 9, 10, 17 വാർഡുകളുമാണ് കോവിഡ് കണ്ടൈൻമെന്റുകളായി പ്രഖ്യാപിച്ചത്.

അമ്പലവയൽ ഗ്രാമപഞ്ചായത്തിലെ മാങ്ങോട്ട് കോളനിയും മീനങ്ങാടി ഗ്രാമപഞ്ചായത്തിലെ തച്ചമ്പത്ത് കോളനിയും കോവിഡ് കണ്ടൈൻമെന്റുകളാണ്.
കോവിഡ് കണ്ടൈൻമെന്റുകളായി പ്രഖ്യാപിച്ച സ്ഥലങ്ങളിൽ ഇന്ന് മുതൽ നിയന്ത്രണം തുടങ്ങും. തിരുനെല്ലി പഞ്ചായത്തിൽ ഉച്ചയ്ക്ക് രണ്ട് മുതലാണ് നിയന്ത്രണം തുടങ്ങുക. പതിനാല് ദിവസത്തേക്കാണ് നിയന്ത്രണം ഏർപ്പെടുത്തിയിരിക്കുന്നത്. ഇവിടങ്ങളിൽ അവശ്യസാധനങ്ങൾ വിൽപന നടത്തുന്ന കടകൾക്ക് മാത്രമാണ് തുറക്കാൻ അനുമതി.

വളരെ അത്യാവശ്യ കാര്യങ്ങൾക്ക് മാത്രമെ പുറത്തിറങ്ങാൻ പാടുളളു. ഹോം ഡെലിവറി സംവിധാനമാണ് ഇവിടെ ഉണ്ടാവുക. ബന്ധപ്പെട്ട തദ്ദേശ സ്ഥാപനങ്ങൾ നൽകുന്ന ഫോൺ നമ്പറിൽ പൊതുജനങ്ങൾക്ക് അവശ്യ വസ്തുക്കൾ ലഭ്യമാക്കുന്നതിനുളള സഹായം തേടാം.

82 പേർ കൂടി നിരീക്ഷണത്തിൽ
കൊവിഡ് 19 രോഗ പശ്ചാത്തലത്തിൽ ജില്ലയിൽ 82 പേർ കൂടി നിരീക്ഷണത്തിലായി. ഇതോടെ ജില്ലയിൽ നിരീക്ഷണത്തിലുള്ളവരുടെ എണ്ണം 900 ആയി. ഒരു കൊവിഡ് രോഗബാധിതൻ ഉൾപ്പെടെ 10 പേരാണ് ആശുപത്രിയിൽ നിരീക്ഷണത്തിലുള്ളത്. 23 പേരുടെ നിരീക്ഷണ കാലം പൂർത്തിയായി. ജില്ലയിലെ 457 സാമ്പിളുകൾ പരിശോധിച്ചതിൽ 429 എണ്ണത്തിന്റെ ഫലം നെഗറ്റീവ് ആണ്. 21 സാമ്പിളുകളുടെ ഫലം ലഭിക്കാനുണ്ട്.
ജില്ലയിലെ 14 ചെക്ക് പോസ്റ്റുകളിൽ 2515 വാഹനങ്ങളിലായി എത്തിയ 3454 ആളുകളെ സ്‌ക്രീനിംങ്ങിന് വിധേയമാക്കിയതിൽ ആർക്കും തന്നെ രോഗലക്ഷണങ്ങൾ കണ്ടെത്തിയിട്ടില്ല.