ഫറോക്ക്: ലോ​ക്ക് ഡൗണിന്റെ മറവിൽ ചാലിയാറിൽ അനധികൃത മണലെടുപ്പ് വ്യാപകമെന്ന് പരാതി​. കൊളത്തറ, ചുങ്കം, മാട്ടുമ്മൽ പ്രദേശങ്ങളിൽ നിന്ന് രാത്രി​യിൽ തോണികളിൽ മണൽ കോടമ്പുഴയിലെ ചാലിയാർ തീരത്തുള്ള താഴത്തൊടി, കല്ലട, ​മഠത്തിൽത്താഴം എന്നീ​ പാതാറുകളിൽ എത്തിക്കുകയും അവിടെ നിന്ന് വാഹനങ്ങളിൽ കയറ്റി വിൽപ്പന നടത്തുകയു​മാണ് . രാത്രി 11 മണിയോടെ തുടങ്ങുന്ന മണൽക്കടത്ത് പുലർച്ചെ 4 മണി വരെ തുടരുന്നതായി സമീപവാസികൾ പറയുന്നു.10,000 മുതൽ 15,000 രൂപ വരെയാണ് ലോഡിന് ഈടാക്കുന്നത്. ഹോട് സ്പോട്ടായി പ്രഖ്യാപിച്ച സ്ഥലമാണ് കൊളത്തറ. അവിടെ മണലൂറ്റ് സംഘം ഒത്തുചേരുന്നത് രോഗവ്യാപനത്തിന് കാരണമായേക്കുമെന്ന് നാട്ടുകാർ ഭയക്കുന്നു. ഒരു മാസമായി നടക്കുന്ന​ ​മണൽക്കടത്തിനെതിരെ പൊലീസ് നടപടി ശക്തമാക്കണമെന്ന ആവശ്യം ഉയർന്നിട്ടുണ്ട്.