കോഴിക്കോട്: കൊവിഡ് മുക്തജില്ലകളുടെ നിരയിലേക്ക് കടന്നെങ്കിലും കോഴിക്കോട്ട് നിരീക്ഷണത്തിലുള്ളവരുടെ എണ്ണം ഉയർന്നു. ഇന്നലെ പുതുതായി വന്ന 1,186 പേർ ഉൾപ്പെടെ 2080 പേർ ഇപ്പോൾ നിരീക്ഷണത്തിലുണ്ട്.

ഇതിനകം 22,909 പേർ നിരീക്ഷണം പൂർത്തിയാക്കിയതായി ജില്ലാ മെഡിക്കൽ ഓഫീസർ ഡോ.വി.ജയശ്രീ അറിയിച്ചു. പുതുതായി 6 പേർ ഉൾപ്പെടെ 17 പേരാണ് ആശുപത്രിയിൽ നിരീക്ഷണത്തിലുള്ളത്. 10 പേരെ ഇന്നലെ ആശുപത്രിയിൽ നിന്നും ഡിസ്ചാർജ്ജ് ചെയ്തു.

ഇന്നലെ 53 സ്രവ സാമ്പിൾ പരിശോധനയ്ക്ക് അയച്ചിട്ടുണ്ട്. 160 പേരുടെ പരിശോധനാ ഫലം കൂടി ലഭിക്കാൻ ബാക്കിയുണ്ട്.

മെന്റൽ ഹെൽത്ത് ഹെല്പ് ലൈനിലൂടെ 8 പേർക്ക് ഇന്നലെ കൗൺസലിംഗ് നൽകി. ജില്ലയിൽ 2657 സന്നദ്ധസേന പ്രവർത്തകർ ഇന്നലെ 8874 വീടുകൾ സന്ദർശിച്ച് ബോധവത്കരണം നടത്തി.