കോഴിക്കോട്: പ്രവാസികളും അന്യസംസ്ഥാനത്തുള്ളവരും നാട്ടിലേക്ക് വരുന്ന സമയത്ത് ക്വാറൻന്റെയിൻ സംവിധാനം കൃത്യമായി നടപ്പിലാക്കാൻ തദ്ദേശ സ്വയംഭരണ സ്ഥാപനങ്ങൾ ശ്രദ്ധിക്കണമെന്ന് പുരുഷൻ കടലുണ്ടി എം.എൽ.എ ആവശ്യപ്പെട്ടു. ബാലുശ്ശേരി മണ്ഡലത്തിലെ ഒമ്പത് പഞ്ചായത്തുകളിലെയും കൊവിഡ് പ്രതിരോധ പ്രവർത്തനങ്ങൾ അവലോകനം ചെയ്യുന്നതിനായി ചേർന്ന വിവിധ വകുപ്പുകളുടെ യോഗത്തിലാണ് എം.എൽ.എ ഇക്കാര്യമറിയിച്ചത്. ആവശ്യമായി വന്നാൽ വനിതകൾക്ക് മാത്രമായി പൊതു ക്വാറന്റൈൻ സംവിധാനം ബാലുശ്ശേരി ബ്ലോക്ക് പഞ്ചായത്തിന്റെ നേതൃത്വത്തിൽ ഒരുക്കാനും തീരുമാനമായി.

ഒമ്പത് പഞ്ചായത്തുകളിൽ വീടുകളിലും, വിവിധ സ്ഥാപനങ്ങളിലുമായി 237 പേരാണ് നിരീക്ഷണത്തിലുള്ളത്. ബാലുശ്ശേരി ബ്ലോക്ക് പഞ്ചായത്ത് പ്രസിഡന്റ് വി. പ്രതിഭ, പേരാമ്പ്ര ബ്ലോക്ക് പഞ്ചായത്ത് പ്രസിഡന്റ് എ.സി. സതി, ഗ്രാമപഞ്ചായത്ത് പ്രസിഡന്റുമാർ, ബാലുശ്ശേരി, പേരാമ്പ്ര, കൂരാച്ചുണ്ട് സർക്കിൾ ഇൻസ്‌പെക്ടർമാർ, അത്തോളി സബ് ഇൻസ്‌പെക്ടർ, മെഡിക്കൽ ഓഫീസർമാർ എന്നിവർ പങ്കെടുത്തു.