കുന്ദമംഗലം: വയനാട് മുറിയനാലിലെ ആഡംബര വർക്ക് ഷോപ്പിലുണ്ടായ തീപിടിത്തത്തിൽ 11 ബെൻസ് കാറുകൾ കത്തിനശിച്ചു. തൃശൂർ സ്വദേശി ജോസഫിന്റെ എമിറേറ്റ്സ് മോട്ടോഴ്സ് എന്ന ആഡംബരകാറുകളുടെ വർക്ക്‌ഷോപ്പിനാണ് ഇന്നലെ രാവിലെ ആറിന് തീപിടിച്ചത്.
വർക്ക് ഷോപ്പിനടുത്ത് താമസിക്കുന്ന ജോസഫും സമീപവാസികളും തീയണയ്‌ക്കാൻ ശ്രമിച്ചെങ്കിലും പെട്രോൾ വാഹനങ്ങൾ ഓരോന്നായി ഉഗ്രശബ്‌ദത്തോടെ പൊട്ടിത്തെറിക്കുകയായിരുന്നു. ചൂടും പുകയും കാരണം രക്ഷാപ്രവർത്തനം ദുഷ്കരമായി. വർക് ഷോപ്പിനകത്തുണ്ടായിരുന്ന മറ്റു വാഹനങ്ങൾക്കും ഉപകരണങ്ങൾക്കും കേടുപാടുണ്ടായി.
വെള്ളിമാട്കുന്ന്, നരിക്കുനി, മുക്കം ഫയർ സ്‌റ്റേഷനുകളിലെ നാലു യൂണിറ്റും കുന്ദമംഗലം പൊലീസും ഒരുമണിക്കൂർ ശ്രമിച്ചാണ് തീയണച്ചത്. രണ്ടര കോടിയിലധികം രൂപയുടെ നഷ്ടമുണ്ടായെന്നാണ് പ്രാഥമിക നിഗമനം. കുന്ദമംഗലം പൊലീസ് അന്വേഷണം ആരംഭിച്ചു.