കുന്ദമംഗലം: പെരിങ്ങളം റോഡിൽ പ്രവൃത്തി പൂർത്തീകരിച്ചു വരുന്ന കുന്ദമംഗലം മാതൃകാ പൊലീസ് സ്​റ്റേഷൻ നിർമ്മാണത്തിന് 1.68 കോടി രൂപ കൂടി അനുവദിച്ചതായി പി.ടി.എ റഹീം എം.എൽ.എ അറിയിച്ചു. എം.എൽ.എയുടെ നിയോജകമണ്ഡലം ആസ്തി വികസന ഫണ്ടിൽ നിന്നാണ് ഈ തുക അനുവദിച്ചിട്ടുള്ളത്. 1.3 കോടി രൂപ ചെലവിൽ നിർമ്മിക്കുന്ന ഹൈടെക് പൊലീസ് സ്​റ്റേഷൻ കെട്ടിടത്തിന്റെ പ്രവൃത്തി അന്തിമ ഘട്ടത്തിലാണ്. പൊലീസ് സ്‌റ്റേഷനിലേക്കുള്ള റോഡിന്റേയും അനുബന്ധസൗകര്യങ്ങളുടേയും ആവശ്യത്തിന് വേണ്ടി 1.05 കോടി രൂപയും കുന്ദമംഗലം ടൗണിൽ പൊലീസ് നിയന്ത്രണത്തിൽ സർവയലൻസ് സിസ്​റ്റം സ്ഥാപിക്കുന്നതിന് 63.5 ലക്ഷം രൂപയുമാണ് ഇപ്പോൾ അനുവദിച്ചിട്ടുള്ളത്. കുന്ദമംഗലത്ത് പെരിങ്ങളം കു​റ്റിക്കാട്ടൂർ റോഡിൽ ആഭ്യന്തര വകുപ്പിന്റെ കൈവശത്തിലുള്ള ഒന്നര ഏക്കർ സ്ഥലത്ത് 6500 സ്‌ക്വയർ ഫീ​റ്റ് വിസ്തീർണ്ണത്തിലാണ് മാതൃകാ പൊലീസ് സ്‌​റ്റേഷൻ പ്രവൃത്തി തകൃതിയായി നടന്നു വരുന്നത്. കെട്ടിട നിർമ്മാണത്തിന്റേയും
അനുബന്ധ സൗകര്യങ്ങളുടേയും കരാർ എടുത്തിട്ടുള്ളത് ഊരാളുങ്കൽ ലേബർ കോൺട്രാക്ട് കോ-ഓപ്പറേ​റ്റീവ് സൊസൈ​റ്റിയാണ്. എൻ.ഐ.ടിയിലെ ആർകിടെക്ചറൽ വിഭാഗം തയ്യാറാക്കിയ പ്ലാൻ പ്രകാരം നിർമ്മിക്കുന്ന കെട്ടിടം എല്ലാവിധ അത്യന്താധുനികസൗകര്യങ്ങളോടെയുമാണ് ഡിസൈൻ ചെയ്തിട്ടുള്ളത്.