തിരുവനന്തപുരം : വിദേശത്ത് കൊവിഡ് ബാധിച്ച് എട്ടുവയസുകാരൻ ഉൾപ്പടെ അഞ്ചുമലയാളികൾ മരിച്ചു. വൈദികനും എട്ടുവയസുകാരനും ഉൾപ്പടെ മൂന്നുപേർ അമേരിക്കയിലും രണ്ടുപേർ യു.എ.ഇയിലുമാണ് മരിച്ചത്.

കോട്ടയം പാലാ പന്തത്തല വട്ടോടിയിൽ സുനീഷ് സുകുമാരൻ-ദീപ ദമ്പതികളുടെ മകൻ അദ്വൈത് (8) ആണ് ന്യൂയോർക്കിൽ മരിച്ചത്. നഴ്‌സുമാരായ സുനീഷും ദീപയും പത്ത് വർഷത്തോളമായി ന്യൂയോർക്കിലെ എലംസ്‌ഫോഡിലാണ് താമസം. ജോലിക്കിടെ കൊവിഡ് ബാധിച്ച ഇരുവരും ഹോം ക്വാറന്റൈനിൽ ആയിരുന്നു. ഇവർ സുഖം പ്രാപിച്ച് ജോലിയിൽ പ്രവേശിക്കാനിരിക്കെയാണ് അദ്വൈതിന് രോഗലക്ഷണം കണ്ടത്. ഉടൻ ചികിത്സ തേടിയെങ്കിലും രക്ഷിക്കാനായില്ല. രണ്ടാം ക്ലാസ് വിദ്യാർത്ഥിയായിരുന്നു. നാലാം ക്ലാസ് വിദ്യാർത്ഥി അർജുൻ സഹോദരനാണ്.

അമേരിക്കയിൽ മരിച്ച മറ്റുരണ്ടുപേർ കൊല്ലം സ്വദേശികളാണ്. മാർത്തോമ്മ സഭാ വൈദികനായിരുന്ന കൊട്ടാരക്കര കിഴക്കേ തെരുവ് പട്ടമല കല്ലുപറമ്പിൽ വീട്ടിൽ പരേതരായ മാത്യുവിന്റെയും മറിയാമ്മയുടെയും മകൻ ഫാ. എം. ജോൺ (87), കുണ്ടറ പുന്നമുക്ക് കല്ലറയ്ക്കൽ തടത്തുവിള പുത്തൻ വീട്ടിൽ ഗീവർഗീസ് എം. പണിക്കർ (63) എന്നിവരാണ് ഫിലാ‌ഡൽഫിയയിൽ മരിച്ചത്.

ക്രിസ്റ്റോസ് മാർത്തോമ്മാ ചർച്ച് അംഗമായിരുന്ന ഫാ. എം. ജോൺ കുടുംബസമേതം അമേരിക്കയിൽ സ്ഥിരതാമസമായിരുന്നു. ഭാര്യ: അന്നമ്മ. മക്കൾ: സുജ, ജയ, എബി, ആശ. ഫിലാഡൽഫിയയിൽ പണിക്കർ ട്രാവത്സ് എന്ന സ്ഥാപനം നടത്തിവരികയായിരുന്നു ഗീവർഗീസ് എം. പണിക്കർ. ഭാര്യ: അന്നമ്മ. ജി. പണിക്കർ (നഴ്സ്, അമേരിക്ക). മക്കൾ: ജോയൽ, ആൽബിൻ. മരുമകൾ: ജിസി ജോയൽ.

ചാവക്കാട് എടക്കഴിയൂർ നാലാംകല്ല് പള്ളത്ത് വീട്ടിൽ ഹസ്സന്റെ മകൻ മുഹമ്മദ് ഹനീഫയാണ് (65) റാസൽഖൈമയിൽ മരിച്ചത്. അറേബ്യൻ ഇന്റർനാഷണൽ കമ്പനിയിൽ (എ.ആർ.സി) സൂപ്പർവൈസറായിരുന്നു. ഭാര്യ: റഫീഖ. മക്കൾ: ഹാഷിൽ, ഹസ്ബിന.

കോഴഞ്ചേരി നെല്ലിക്കാല തെക്കേപറമ്പിൽ പരേതനായ രാമൻകുട്ടിയുടെ മകൻ റോഷൻ കുട്ടി (58) അബുദാബിയിലാണ് മരിച്ചത്. എൻ.പി.സി.സി ഉദ്യോഗസ്ഥനായിരുന്നു. ഭാര്യ: ബിന്ദു. മക്കൾ: പ്രിയ (എം.ബി.ബി.എസ് വിദ്യാർത്ഥി ), പാർത്ഥിപ് (പ്ലസ്ടു വിദ്യാർത്ഥി).