കോട്ടയം : ചുവപ്പുകേന്ദ്രത്തിലാണെങ്കിലും പ്രതീക്ഷയുടെ പച്ചപ്പ് പകരുന്ന ദിനമായിരുന്നു ഇന്നലെ. മൂന്ന് ആരോഗ്യ പ്രവർത്തകരടക്കം ജില്ലയിൽ രോഗമുക്തി നേടിയത് 12 പേരാണ്. ഇനി അഞ്ചു പേർ മാത്രമാണ് ആശുപത്രിയിൽ ചികിത്സയിലുള്ളത്. മെഡിക്കൽ കോളേജ് ആശുപത്രിയിൽ കഴിയുന്ന 11 പേരും കോട്ടയം ജില്ലാ ആശുപത്രിയിലുണ്ടായിരുന്ന ഒരാളുടേയും ഫലമാണ് നെഗറ്റീവായത്. ഇടുക്കി ജില്ലയിൽനിന്നുള്ള ഒരാളും മെഡിക്കൽ കോളേജ് ആശുപത്രിയിലാണ്. രണ്ടാം ഘട്ടത്തിൽ ആദ്യം രോഗം സ്ഥിരീകരിച്ച കോട്ടയം മാർക്കറ്റിലെ ചുമട്ടു തൊഴിലാളിയും രോഗവിമുക്തരായവരിൽ ഉൾപ്പെടുന്നുണ്ട്.

കൊവിഡിനെ തോൽപ്പിച്ചത് ഇവർ

1) വിജയപുരം സ്വദേശിയായ കോട്ടയം മാർക്കറ്റിലെ ചുമട്ടുതൊഴിലാളി(37)

2. ആദ്യം രോഗം സ്ഥിരീകരിച്ച ചുമട്ടുതൊഴിലാളിയുടെ സമ്പർക്കപ്പട്ടികയിലുള്ള മുട്ടമ്പലത്തെ ചുമട്ടുതൊഴിലാളി(40)

3. തിരുവനന്തപുരം ജില്ലയിലെ സ്വകാര്യ ആശുപത്രിയിലെ നഴ്സായിരുന്ന കുഴിമറ്റം സ്വദേശി(33)

4. കുഴിമറ്റം സ്വദേശിയായ നഴ്സിന്റെ അമ്മ(60)

5. കുഴിമറ്റം സ്വദേശിയായ നഴ്സിന്റെ ബന്ധുവായ സ്ത്രീ (55)

6. പാറമ്പുഴ പ്രാഥമികാരോഗ്യ കേന്ദ്രത്തിലെ ആരോഗ്യ പ്രവർത്തകൻ(40)

7. കോട്ടയം ജില്ലാ ആശുപത്രിയിലെ ആരോഗ്യപ്രവർത്തകൻ(32)

8. വിദേശത്തുനിന്ന് വന്ന സംക്രാന്തി സ്വദേശിനി(55)

9. അന്തർ സംസ്ഥാന ലോറി ഡ്രൈവറായ മണർകാട് സ്വദേശി(50)

10. കോഴിക്കോട് പോയിവന്ന മണർകാട് സ്വദേശിയായ ട്രക്ക് ഡ്രൈവർ(43)

11. ചങ്ങനാശേരിയിൽ താമസിക്കുന്ന തൂത്തുക്കുടിയിൽ നിന്നുള്ള തമിഴ്നാട് സ്വദേശി(56)

12. സേലത്തുനിന്ന് വന്ന ബാങ്ക് ജീവനക്കാരി(28)