കോട്ടയം: തന്റെ തരിശായി കിടന്ന പുരയിടത്തിൽ അയൽവാസികൾ പശുക്കളെ മേയാൻ വിട്ടതിൽ പ്രകോപിതനായി നാലു പശുക്കളെയും ഒരു മൂരിക്കിടാവിനെയും മുപ്പല്ലിക്ക് (കൂർത്ത അഗ്രങ്ങളുള്ള ഇരുമ്പുകമ്പി) കുത്തിയ വിമുക്തഭടൻ അറസ്റ്റിൽ. അയ്മനം വല്ല്യാട് പുത്തൻതോട് പാലത്തിനു സമീപം താമസിക്കുന്ന മണലേൽ മാത്തുക്കുട്ടിയെയാണ് (61) കോട്ടയം വെസ്റ്റ് സി.ഐ എം.ജെ അരുൺ അറസ്റ്റ് ചെയ്തത്. കഴിഞ്ഞ ഏപ്രിൽ 17നായിരുന്നു സംഭവം.

അയ്മനം കോടുവത്ര ഷാജിഭവനിൽ ഷൈൻമോൻ, ചേപ്പഴം ജോയി തോമസ് എന്നിവരുടെ നാലു പശുക്കൾക്കും ഒരു മൂരിക്കിടാവിനുമാണ് മുപ്പല്ലിക്ക് കുത്തേറ്റത്. കൂടാതെ ഇരുമ്പുകമ്പിക്ക് അടിക്കുകയും ചെയ്തു. പശുക്കളുടെ കഴുത്തിനാണ് മുപ്പല്ലിക്ക് കുത്തേറ്റത്. നാലു പശുക്കളുടെയും നടുവിന് കമ്പിവടിക്കുള്ള അടിയിൽ ക്ഷതമേറ്റിട്ടുണ്ടെന്ന് വെറ്ററിനറി സ‌ർജൻ ഡോ.ജോബി വ്യക്തമാക്കി. മൂരിക്കിടാവിന്റെ കാലിൽ മുപ്പല്ലിയുടെ ഒരു ആണി തറച്ചിരിപ്പുണ്ടായിരുന്നു. ഇത് ശസ്ത്രക്രിയയിലൂടെ പുറത്തെടുത്തു.