ഇ-ടോക്കൺ സംവിധാനം ഏർപ്പെടുത്തും

കോട്ടയം : കൊവിഡ് മുൻകരുതൽ നടപടികളുടെ ഭാഗമായി നിറുത്തിവച്ചിരുന്ന വിവിധ സേവനങ്ങൾ മോട്ടോർവാഹനവകുപ്പ് ഇ-ടോക്കൺ സംവിധാനത്തോടെ 25 ന് പുനരാരംഭിക്കും. ഫിറ്റ്‌നസ് ടെസ്റ്റ്, പുതിയ വാഹനങ്ങളുടെ രജിസ്‌ട്രേഷൻ, പഴയ വാഹനങ്ങളുടെ രജിസ്‌ട്രേഷൻ പുതുക്കൽ, ഓൾട്ടറേഷൻ എന്നിവയ്ക്കായുള്ള പരിശോധനകൾ, വാഹനവും ലൈസൻസുമായി ബന്ധപ്പെട്ട മറ്റ് സേവനങ്ങളുമാണ് ലഭ്യമാക്കുന്നത്.

വകുപ്പിൻറെ വെബ്‌സൈറ്റിൽ (www.mvd.kerala.gov.in) ഇ-ടോക്കൺ സംവിധാനത്തിലൂടെ സേവനത്തിനായി എത്തേണ്ട തീയതിയും സമയവും തിരഞ്ഞെടുത്തശേഷം നിശ്ചിത സമയത്ത് വാഹനവുമായി എത്തണമെന്ന് റീജിയണൽ ട്രാൻസ്‌പോർട്ട് ഓഫീസർ വി.എം. ചാക്കോ അറിയിച്ചു.

ആർ.ടി. ഓഫീസിന്റെ പരിധിയിൽ വരുന്ന വാഹനങ്ങൾ മെഡിക്കൽ കോളേജ് ഗൈനക്കോളജി ബ്ലോക്കിന് സമീപം ബാബു ചാഴികാടൻ റോഡിലാണ് പരിശോധനയ്ക്കായി ഹാജരാക്കേണ്ടത്. വാഹനവുമായി ഉടമയോ ഡ്രൈവറോ (ഒരാൾ മാത്രം) എത്താവൂ. വാഹനവും ലൈസൻസുമായി ബന്ധപ്പെട്ട് ഓൺലൈനിൽ ലഭ്യമല്ലാത്ത സേവനങ്ങൾക്കായുള്ള അപേക്ഷകൾ ഓഫീസിൽ സമർപ്പിക്കുന്നതിനും ഇ-ടോക്കൺ സംവിധാനം പ്രയോജനപ്പെടുത്തണം.

ഓൺലൈനിൽ സമർപ്പിച്ച അപേക്ഷയുടെ പ്രിന്റൗട്ട്, പണം അടച്ച രസീത്, സേവനം കഴിഞ്ഞ് രേഖ ലഭിക്കുന്നതിനുള്ള സ്വന്തം മേൽവിലാസമെഴുതി 42 രൂപയുടെ സ്റ്റാമ്പ് ഒട്ടിച്ച കവർ എന്നിവ ഇതിനായി ക്രമീകരിച്ചിട്ടുള്ള പെട്ടിയിൽ നിക്ഷേപിക്കണം. ഫോൺ നമ്പറും രേഖപ്പെടുത്തണം.ഫിറ്റ്‌നസ് ടെസ്റ്റിന് കൊണ്ടുവരുന്ന വാഹനങ്ങളുടെ അസ്സൽ രേഖകൾക്കൊപ്പം പുക പരിശോധനാ സർട്ടിഫിക്കറ്റിന്റെ പകർപ്പും ഹാജരാക്കണം. സ്പീഡ് ഗവർണറുണ്ടെങ്കിൽ അതിന്റെ രേഖകളുടെയും, ജി.പി.എസ് വേണ്ടവയ്ക്ക് ജി.പി.എസ് ഘടിപ്പിച്ച ടെമ്പററി ഇൻസ്റ്റലേഷൻ സർട്ടിഫിക്കറ്റിന്റെയും പകർപ്പുകൾ നൽകണം.