വൈക്കം : മഴ ശക്തി പ്രാപിക്കുന്നതിന് മുൻപെ വടയാറിൽ മൂവാറ്റുപുഴയാറിന്റെ തീരം ഇടിഞ്ഞുതാഴ്ന്നത് നിരവധി കുടുംബങ്ങളെ ഭീതിയിലാഴ്ത്തുന്നു. വഴിയടക്കം പുഴയെടുത്തതോടെ പ്രദേശത്തെ 20 ലധികം കുടുബങ്ങളാണ് ദുരിതത്തിലായത്. രോഗികളെയടക്കം വാഹനങ്ങളിൽ ആശുപത്രിയിലെത്തിക്കാൻ ഇതുമൂലം ബുദ്ധിമുട്ടിലായിരിക്കുകയാണ്.

ഉദയനാപുരം പടിഞ്ഞാറെക്കരയിലെ മനക്കൽ കുറുന്തറ റോഡിന്റെ 50 മീ​റ്ററോളം ഭാഗമാണ് കഴിഞ്ഞ ദിവസം ഇടിഞ്ഞത്. കുട്ടികളടക്കം നടന്നു പോകുന്ന വഴിയിൽ സംഭവ സമയത്ത് ആരും ഇല്ലാതിരുന്നതിനാലാണ് ദുരന്തം ഒഴിവായത്. 5 മീ​റ്റർ വീതിയിൽ റോഡ് പുഴയെടുത്തിട്ടുണ്ട്. കൂടുതൽ ഭാഗത്ത് വിള്ളൽ വീണതോടെ ഏതു നിമിഷവും റോഡ് കൂടുതൽ ഇടിയുമെന്ന നിലയിലാണ്. സമീപത്തെ പത്മാലയത്തിൽ ചന്ദ്രചൂഡന്റെ വീടും അപകടാവസ്ഥയിലായി. പ്രദേശത്തെ കുടിവെള്ള പൈപ്പുകളടക്കം കടന്നു പോകുന്നത് ഈ റോഡിലൂടെയാണ്. വരുംദിവസങ്ങളിൽ കുടിവെള്ളവും മുട്ടുമോയെന്ന ഭീതിയിലാണ് നാട്ടുകാർ.

അധികൃതരുടെ അനാസ്ഥയെന്ന്

ഒരു പതി​റ്റാണ്ടു മുൻപാണ് പുഴയോരത്തെ ബണ്ട് ഇവിടെ വഴിയാക്കി മാ​റ്റിയത്. പുഴ വളഞ്ഞൊഴുകുന്ന ഇവിടെ അപകട ഭീഷണി ഉണ്ടായിട്ടും സുരക്ഷയൊരുക്കാത്തതാണ് തീരമിടിയാൻ കാരണമെന്ന് പ്രദേശവാസികൾ പറയുന്നു. ഈ ഭാഗത്ത് ഒഴുക്കിന്റെ ശക്തി കുറയ്ക്കാനുള്ള മുട്ടുകൾ സ്ഥാപിക്കുകയും തീരംകല്ല് കെട്ടി സംരക്ഷിക്കുകയും ചെയ്തില്ലെങ്കിൽ കാലവർഷത്തിൽ വലിയ നാശ നഷ്ടമുണ്ടാകാൻ സാദ്ധ്യത ഏറെയാണ്. പ്രളയകാലത്തും കഴിഞ്ഞ വെള്ളപ്പൊക്കത്തിലും ഏറെ നാശനഷ്ടങ്ങൾ ഇവിടെ നേരിട്ടിരുന്നു.

ഇടിഞ്ഞത് മനക്കൽ കുറുന്തറ റോഡ്

5 മീ​റ്റർ വീതിയിൽ റോഡ് പുഴയെടുത്തു

കുടിവെള്ള പൈപ്പുകൾ കടന്നു പോകുന്നു