കോട്ടയം: ജില്ലയിൽ ഇന്നലെ രണ്ടു പേർക്ക് കൂടി കൊവിഡ് സ്ഥിരീകരിച്ചതോടെ ചികിത്സയിലുള്ളവരുടെ എണ്ണം 11ആയി. 11ന് ദുബായിൽനിന്നെത്തി ഹോം ക്വാറന്റൈനിൽ കഴിഞ്ഞിരുന്ന പായിപ്പാട് നാലു കോടി സ്വദേശിക്കും (30) 17ന് അബുദാബിയിൽ നിന്നെത്തി ഗാന്ധിനഗറിലെ ക്വാറന്റൈൻ കേന്ദ്രത്തിൽ കഴിഞ്ഞിരുന്ന വൈക്കം ഇരുമ്പൂഴിക്കര സ്വദേശിക്കുമാണ് (37) രോഗം കണ്ടെത്തിയത്.

പ്രായമായ ദമ്പതികളും ഒരു കുട്ടിയും ഉൾപ്പെടെ മൂന്നു ബന്ധുക്കൾക്കൊപ്പം എത്തിയതിനാലാണ് നാലുകോടി സ്വദേശിക്ക് ഹോം ക്വാറന്റൈനിൽ കഴിയാൻ അനുമതി നൽകിയത്. മൂന്ന് ബന്ധുക്കളുടെയും പരിശോധന ഫലം നെഗറ്റീവാണ്. ക്വാറന്റൈൻ കാലാവധി ഇന്ന് പൂർത്തിയാകാനിരിക്കെയാണ് യുവാവിന് രോഗം കണ്ടെത്തിയത്. ഇയാൾക്ക് പ്രകടമായ രോഗ ലക്ഷണങ്ങളില്ല. ഇതേ വിമാനത്തിലെത്തിയ മറ്റു രണ്ടു പേർക്ക് ജില്ലയിൽ രോഗം സ്ഥിരീകരിച്ചിരുന്നു.

അബുദാബിയിൽനിന്നുള്ള വിമാനത്തിൽ ഇരുമ്പൂഴിക്കര സ്വദേശിക്കൊപ്പമെത്തിയ നാലു സുഹൃത്തുക്കളുടെ പരിശോധനാ ഫലം നെഗറ്റീവാണ്. ഇതേ വിമാനത്തിൽ വന്ന മൂന്നു പേർക്ക് മറ്റു ജില്ലകളിൽ രോഗം സ്ഥിരീകരിച്ചിട്ടുണ്ട്. രണ്ടു പേരെയും കോട്ടയം മെഡിക്കൽ കേളേജ് ആശുപത്രിയിൽ പ്രവേശിപ്പിച്ചു. ഇതുവരെ 22 പേർ ജില്ലയിൽ രോഗമുക്തരായി.