തിരുവനന്തപുരം: കൊവിഡിന്റെ പശ്ചാത്തലത്തിൽ വിദേശത്ത് നിന്ന് കേരളത്തിലേക്ക് മടങ്ങിയെത്താൻ നോർക്കയിൽ രജിസ്റ്റർ ചെയ്ത പ്രവാസി മലയാളികളുടെ എണ്ണം 3.98 ലക്ഷം ആയി. ഇതരസംസ്ഥാനങ്ങളിൽ നിന്ന് 1.36 ലക്ഷം പേരാണ് ഇതുവരെ രജിസ്റ്റർ ചെയ്തത്. നോർക്ക റൂട്ട്‌സ് വാർത്താക്കുറിപ്പിലാണ് ഇക്കാര്യം അറിയിച്ചത്.

യു.എ.ഇയിൽ നിന്നാണ് ഏറ്റവും കൂടുതൽപേർ രജിസ്റ്റർ ചെയ്തത്. 175423 പേർ. സൗദി അറേബ്യയിൽ നിന്ന് 54305 പേരും യു.കെയിൽ നിന്ന് 2437 പേരും അമേരിക്കയിൽ നിന്ന് 2255 പേരും യുക്രൈയിനില്‍ൽ നിന്ന് 1958 പ്രവാസികളും രജിസ്റ്റർ ചെയ്തിട്ടുണ്ട്.

അന്യസംസ്ഥാനങ്ങളുടെ കാര്യത്തിൽ കർണാടകയിൽ നിന്നാണ് ഏറ്റവും കൂടുതൽപേർ രജിസ്റ്റർ ചെയ്തിട്ടുള്ളത്. 44871 ഇവിടെ നിന്ന് രജിസ്റ്റർ ചെയ്തിട്ടുള്ളത്. തമിഴ്നാട് (41425),​ മഹാരാഷ്ട്ര (19029) എന്നീ സംസ്ഥാനങ്ങളാണ് തൊട്ടുപിന്നിൽ.

രജിസ്റ്റർ ചെയ്തവരുടെ പേര് വിവരം കേന്ദ്ര വിദേശകാര്യ മന്ത്രാലയത്തിനും അതത് രാജ്യത്തെ എംബസികൾക്കും അയച്ചുകൊടുക്കും. നേരത്തേ പ്രഖ്യാപിച്ചിരുന്ന വിഭാഗങ്ങൾക്ക് മുൻഗണന നൽകാനും അഭ്യർത്ഥിക്കും.