ന്യൂഡൽഹി: രാജ്യത്ത് കൊവിഡ് വൈറസ് ബാധിതരുടെ എണ്ണം 40,000 കടന്നു. കഴിഞ്ഞ 24 മണിക്കൂറിനിടെ 2487 പുതിയ കേസുകളാണ് റിപ്പോർട്ട് ചെയ്തത്. ഇതോടെ രോഗികളുടെ എണ്ണം 40,263 ആയി. ഇതിൽ 28,332 പേരാണ് ചികിത്സയിലുള്ളത്. 11018 പേർ രോഗമുക്തരായി. ഇതുവരെ 1306 പേർ കൊവിഡ് ബാധിച്ചു മരിച്ചതായി കേന്ദ്ര ആരോഗ്യമന്ത്രാലയം അറിയിച്ചു. 24 മണിക്കൂറിനിടെ 83 പേർ മരിച്ചു. സംസ്ഥാനത്ത് ഇന്ന് ഒരു കോവിഡ് കേസുമില്ല; കാസർകോട് സ്വദേശിയുടെ ഫലം നെഗ​റ്റീവായി..

കൊവിഡ് ഏ​റ്റവുമധികം ബാധിച്ച മഹാരാഷ്ട്രയിൽ രോഗികളുടെ എണ്ണം 12,296 ആയി. 2000 പേരുടെ രോഗം ഭേദമായപ്പോൾ 521 പേർ മരണത്തിനു കീഴടങ്ങി. ആന്ധ്രപ്രദേശ് (1583), ഡൽഹി (4122), ഗുജറാത്ത് (5055), മധ്യപ്രദേശ് (2846), രാജസ്ഥാൻ (2772), തമിഴ്നാട് (2757), തെലങ്കാന (1063), ഉത്തർപ്രദേശ് (2626) എന്നിവടങ്ങളാണ് ആയിരത്തിലേറേ രോഗികൾ ഉള്ള മ​റ്റു സംസ്ഥാനങ്ങൾ.

അതേസമയം ലോകത്ത് കൊവിഡ് ബാധിതരുടെ എണ്ണം 35 ലക്ഷം കവിഞ്ഞു. 35,06,399 പേർക്ക് ഇതുവരെ രോഗം സ്ഥിരീകരിച്ചു. 2,45,193 പേർ മരിച്ചു. രോഗബാധിതരിൽ 11,60,996പേർ അമേരിക്കയിലാണ്.