വാഷിംഗ്ടൺ: ഈ വർഷം അവസാനത്തോടെ അമേരിക്കയിൽ കൊവിഡ്​ വൈറസിനുള്ള വാക്സിൻ ലഭ്യമാക്കുമെന്ന് പ്രസിഡന്റ്​ ഡോണാൾഡ് ട്രംപ്. “വർഷാവസാനത്തോടെ വാക്സിൻ ലഭിക്കുമെന്ന് ഞങ്ങൾക്ക് ഉറപ്പുണ്ട്​​. യു.എസ്​ ഗവേഷകരെ പിന്നിലാക്കി മറ്റൊരു രാജ്യം മരുന്ന്​ കണ്ടുപിടിക്കുകയാണെങ്കിൽ അവരെ അനുമോദിക്കാൻ മടിക്കില്ലെന്നും ട്രംപ്​ പറഞ്ഞു. വാഷിംഗ്ടൺ ഡി.സിയിലെ ലിങ്കൺ മെമ്മോറിയലിൽ നിന്ന് പ്രക്ഷേപണം ചെയ്ത ഫോക്സ് ന്യൂസിന്റെ ‘ടൗൺ ഹാൾ’ പരിപാടിയിൽ സംസാരിക്കുകയായിരുന്നു അദ്ദേഹം.

കൊവിഡ്​ പ്രതിരോധിക്കുന്നതിനുള്ള വാക്​സിൻ കണ്ടെത്തുന്നത്​ ഏത്​ രാജ്യക്കാർ എന്നത്​ കാര്യമാക്കില്ല. ഫലപ്രദമായ വാക്​സിൻ ലഭിക്കുക എന്നതാണ്​ പ്രധാനം. സെപ്​തംബറിൽ രാജ്യത്തെ സ്കൂളുകളും സർവകലാശാലകളും വീണ്ടും തുറക്കാൻ ആവശ്യപ്പെടുമെന്നും അദ്ദേഹം പറഞ്ഞു.

വാക്​സിൻ കണ്ടെത്താനുള്ള ഗവേഷണ പ്രക്രിയയിൽ അസാധാരണ വേഗത്തിൽ മനുഷ്യരിൽ പരീക്ഷണങ്ങൾ നടത്തുന്നതിലുണ്ടാകുന്ന അപകടങ്ങളെക്കുറിച്ചുള്ള ചോദ്യത്തിന്​ "അവർ സന്നദ്ധപ്രവർത്തകരാണ്, എന്താണ് ചെയ്യുന്നതെന്ന ബോദ്ധ്യത്തോടെയാണ് അവർ അതിന്​ തയാറായിരിക്കുന്നത്​’’ എന്നായിരുന്നു ട്രംപി​ന്റെ മറുപടി. ഒരു വർഷത്തിനിടെ വാക്​സിൻ കണ്ടെത്തുമെന്ന്​ നേരത്തെ ബിൽ ഗ്രേറ്റ്​സും അറിയിച്ചിരുന്നു. യു.എസിലാണ് ഏറ്റവുമധികം കൊവിഡ് മരണങ്ങളും രോഗബാധിതരും റിപ്പോർട്ട് ചെയ്തിട്ടുള്ളത്.