തൃശൂർ: തൃശൂർ അന്തിക്കാട്ട് രോ​ഗിയെ എടുക്കാനായി വീട്ടിലേക്ക് പോയ 108 ആംബുലൻസ് മറിഞ്ഞ് നഴ്സ് മരിച്ചു. രാത്രി ഏഴ് മണിയോടെയാണ് അപകടമുണ്ടായത്. പെരിങ്ങോട്ടുകര സ്വദേശി ഡോണയാണ് (22) മരിച്ചത്. അവശനിലയിലായ രോ​ഗിയെ എടുക്കാനായി പോകുമ്പോഴായിരുന്നു അപകടം.

അപകടത്തിൽ ആംബുലൻസ് ഡ്രൈവർ അജയ കുമാറിന് ​ഗുരുതരമായി പരിക്കേറ്റു. ഇയാളെ സ്വകാര്യ ആശുപത്രിയിൽ പ്രവേശിപ്പിച്ചു. പുറകോട്ടെടുക്കുകയായിരുന്ന കാർ ആംബുലൻസിൽ ഇടിക്കുകയായിരുന്നു. ഇടിയുടെ ആഘാതത്തിൽ ആംബുലൻസ് റോഡരികിലുണ്ടായിരുന്ന വീടിന്റെ മതിലിൽ ചെന്നിടിച്ചാണ് മറിഞ്ഞത്. മതിൽ പൂർണമായി തകർന്നു.

വാരിയെല്ലിന് ​ഗുരുതര പരുക്കേറ്റ ഡോണ ആശുപത്രിയിലെത്തിക്കുമ്പോഴേക്കും മരിച്ചിരുന്നു. അജയ കുമാർ ഇപ്പോഴും അപകട നില തരണം ചെയ്തിട്ടില്ല.