യുണൈറ്റഡ് നേഷൻസ്: ലോകം മുഴുവൻ കൊവിഡ് മഹാമാരിയാൽ ദുരിതം നേരിടുന്ന ഈ കാലത്ത് ശ്രീബുദ്ധന്റെ സന്ദേശങ്ങളായ ഐക്യത്തിനും സേവനത്തിനും പ്രാധാന്യം വർദ്ധിക്കുന്നുവെന്ന് ഐക്യരാഷ്ട്രസഭ മേധാവി അന്റോണിയോ ഗുട്ടെറസ്. ലോകരാജ്യങ്ങൾ ഒന്നായി നിന്ന് പ്രവർത്തിച്ചാൽ മാത്രമേ ഈ മഹാമാരിയിൽനിന്നു കരകയറാൻ സാധിക്കൂവെന്നും ബുദ്ധജയന്തി സന്ദേത്തിൽ അദ്ദേഹം പറഞ്ഞു.

ബുദ്ധന്റെ ജനനത്തേയും ജീവിതത്തേയും അനുസ്മരിക്കുമ്പോൾ അദ്ദേഹം നൽകിയ സന്ദേശങ്ങളിൽ നിന്നും നമുക്ക് പ്രചോദനം ഉൾക്കൊള്ളാം. ബുദ്ധസന്ദേശങ്ങൾക്ക് എക്കാലത്തേക്കാളും പ്രധാന്യം ഈ സാഹചര്യത്തിൽ വർദ്ധിക്കുകയാണ്. മറ്റുള്ളവരോട് കരുതലും ഐക്യദാർഢ്യവും പ്രകടിപ്പിച്ചുകൊണ്ട് ബുദ്ധജയന്തി ആഘോഷങ്ങളിൽ പങ്കുചേരാമെന്നും അദ്ദേഹം പറഞ്ഞു.

ലോകത്തിലെ ഏറ്റവും പുരാതന മതങ്ങളിലൊന്നായ ബുദ്ധമതം രണ്ടര സഹസ്രാബ്ദങ്ങളായി നൽകിയിട്ടുള്ള സംഭാവനകളെ അംഗീകരിക്കുന്നതിന്റെ ഭാഗമായി 1999 മുതലാണ് ബുദ്ധജയന്തി അന്താരാഷ്ട്രതലത്തിൽ ആചരിച്ചുതുടങ്ങിയത്.