അഹമ്മദാബാദ്​: ജനുവരിയിൽ ടെന്നിസ്​ അക്കാഡമി സന്ദർശിക്കാനായി ഇന്ത്യയിലെത്തിയതായിരുന്നു മാൾഡോവയിൽ നിന്നുള്ള ടെന്നിസ്​ താരം ദിമിത്രി ബാസ്​കോവ്​. കൊവിഡ്​ വ്യാപനത്തെത്തെുടർന്ന്​ ലോക്​ഡൗൺ പ്രഖ്യാപിച്ചതോടെ ഇന്ത്യയിൽ തുടരാൻ നിർബന്ധിതനായി. ഈ സാഹചര്യത്തിൽ അഹമ്മദാബാദിൽ ലോക്​ഡൗൺ മൂലം ബുദ്ധിമുട്ടിലായ പാവപ്പെട്ടവരെ സഹായിക്കാൻ സന്നദ്ധനായി മുന്നോട്ടുവന്നിരിക്കുകയാണ്​ 25കാരൻ​. എയ്​സ്​ ടെന്നിസ്​ അക്കാദമിയിൽ വെച്ച് പ്രദേശ​ത്തെ ചേരികളിലും ഹോട്ട്​സ്​പോട്ടുകളിലും കഴിയുന്ന പാവങ്ങൾക്ക്​ വിതരണം ചെയാനുള്ള ഭക്ഷണ സാധനങ്ങളും റൊട്ടിയും ചോറും മറ്റും തയ്യാറാക്കുന്ന സംഘത്തിനൊപ്പം തിരക്കിലാണ്​ ബാസ്​കോവിപ്പോൾ. സുഹൃത്തായ പ്രമേശ്​ മോദിയോടൊപ്പം ചേർന്നാണ്​ താരം സൽപ്രവർത്തിക്ക്​ മുന്നിട്ടിറങ്ങിയത്​​. ദിവസേന 100 മുതൽ 300 പാക്കറ്റ്​ ഭക്ഷണം വരെ ഇവർ വിതരണം ചെയ്യുന്നുണ്ട്​. ഡേവിസ്​ കപ്പിൽ രണ്ടുതവണ സ്വന്തം രാജ്യത്തെ പ്രതിനിധീകരിച്ച ബാസ്​കോവ്​ വിംബിൾഡണിൽ മുൻനിര വനിത താരമായ സിമോണ ഹാലപ്പിൻെറ പങ്കാളിയായിരുന്നു. ബാസ്​കോവിൻെറ പ്രവർത്തി ഗുജറാത്തി പത്രങ്ങളിൽ വൻ വാർത്തയാണ്​. ഇവർ തയാറാക്കുന്ന ഭക്ഷണപാക്കറ്റുകൾ അഹ്​മദാബാദ്​ മുനിസിപാലിറ്റി ജീവനക്കാരാണ്​ വിതരണം ചെയ്യുന്നത്​. ഡോക്​ടർ ദമ്പതിമാരായ ബാസ്​കോവിൻെറ മാതാപിതാക്കൾ മോസ്​കോയിലാണ്​ താമസം. കോവിഡ്​ മുക്തനായ പിതാവ്​ നിലവിൽ അവിടെ ആംബുലൻസ്​ സർവീസിൽ പ്രവർത്തിക്കുകയാണ്​.