ദുബായ്: കൊവിഡിൽ കേരളത്തിൽ മരണം കുറവാണെങ്കിലും ലോകത്തിൻെറ വിവിധ കോണുകളിൽ മരിച്ചത് 102 മലയാളികളാണ്. ഗൾഫിൽ മരിച്ചത് 53 മലയാളികളാണ്. ഇതിൽ 42 പേരും യു.എ.ഇയിലാണ്. ഇങ്ങനെ നോക്കുമ്പോൾ കൊവിഡ് മലയാളികളെ ശരിക്കും നോവിച്ചു കൊണ്ടിരിക്കുന്നു. വിദേശ രാജ്യങ്ങളിൽ മരിച്ചവരുടെ മൃതദേഹങ്ങൾ ഒരു നോക്ക് കാണാൻ പോലുമാകാതെ നാട്ടിലെ ബന്ധുക്കൾ വിലാപത്തിലാണ്. വിദേശത്ത് നിന്നും മലയാളികളുടെ മരണ വാർത്തകളാണ് എത്തിക്കൊണ്ടിരിക്കുന്നത്. അതാണ് പലരെയും നാടുകളിലെത്താൻ വെമ്പൽ കൊള്ളിപ്പിക്കുന്നത്.

ഗൾഫിൽ മൊത്തം മരിച്ചത് 486 പേർ. സൗദി അറേബ്യയിലും യു.എ.ഇയിലുമാണ് ഏറ്റവുമധികം മരണം. സൗദിയിൽ 229 പേരും യു.എ ഇയിൽ 174 പേരുമാണ് മരിച്ചത്. ഗൾഫിലെ കൊവിഡ് ബാധിതരുടെ എണ്ണം 87,190 ആയി. സൗദിയിൽ രോഗികളുടെ എണ്ണം 35,000 കടന്നു. രോഗികൾ 35,432. കഴിഞ്ഞ 24 മണിക്കൂറിൽ 1,701 പേരിലാണ് സൗദിയിൽ രോഗം സ്ഥിരീകരിച്ചത്. ഖത്തറിൽ ഇന്നലെയും മരണമൊന്നും റിപ്പോർട്ട് ചെയ്തിട്ടില്ല. ആകെ രോഗികൾ 20,201, മരണം 12.

യു.എ.ഇയിൽ രോഗികൾ 16,793. കുവൈറ്റിൽ മൂന്ന് പേരാണ് ഇന്നലെ മരിച്ചത്. ആകെ രോഗികളുടെ എണ്ണം 7,208, മരണം 47. ബഹ്‌റൈനിൽ പുതിയതായി 245 കേസുകൾ ഇന്നലെ റിപ്പോർട്ട് ചെയ്തു.. ആകെ രോഗികൾ 4,444, മരണം എട്ട്. ഒമാനിൽ മരണം.16 ആയി 3,112 പേർക്കാണ് കൊവിഡ് സ്ഥിരീകരിച്ചത്.