കോഴിക്കോട്: മിഠായിത്തെരുവിൽ അനുവാദമില്ലാതെ കട തുറക്കാൻ ശ്രമിച്ചതിന് വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് ടി.നസറുദ്ദീൻ ഉൾപ്പെടെ അഞ്ച് പേർക്കെതിരെ പൊലീസ് കേസെടുത്തു. ഇന്ന് രാവിലെ 9.45 ഓടെയാണ് സംഭവം.മിഠായി തെരുവിൽ കടകൾ തുറന്ന് പ്രവർത്തിക്കാൻ അനുമതിയുണ്ടായിരുന്നില്ല. അവശ്യ വസ്തുക്കൾ വിൽക്കുന്ന കടകൾക്ക് മാത്രമാണ് അവിടെ അനുമതിയുണ്ടായിരുന്നത്. എന്നാൽ വിലക്ക് ലംഘിച്ച് ഇന്ന് കട തുറക്കുമെന്ന് അറിയിച്ചാണ് നസറുദ്ദീനും സംഘവും രാവിലെ മിഠായി തെരുവിൽ എത്തിയത്. തന്റെ ബ്യൂട്ടി സ്റ്റോർ എന്ന കട തുറക്കാൻ ശ്രമിച്ചപ്പോഴേക്കും ടൗൺ സ്‌റ്റേഷനിൽ നിന്നും പൊലീസെത്തി അടപ്പിക്കുകയായിരുന്നു.