തിരുവനന്തപുരം: സംസ്ഥാനത്ത് കൊവിഡ് പ്രതിരോധത്തിനായി ഡോക്ടർമാർ താമസിക്കുന്ന ഹോട്ടലുകൾക്കടക്കം ഒരു സ്ഥാപനത്തിനും വാടകയിനത്തിൽ പ്രതിഫലം നൽകില്ലെന്ന് സർക്കാർ. ക്വാറന്റൈനുവേണ്ടി ഏറ്റെടുത്ത സ്ഥാപനങ്ങൾക്കും ഇത് ബാധകമാണ്. കണ്ണൂരിൽ കൊവിഡ് പ്രതിരോധം നടത്തുന്ന ഡോക്ടർമാരെ താമസിപ്പിച്ച ഹോട്ടലുകൾ റും വാടകയ്ക്കായി സമീപിച്ചപ്പോഴാണ് അധികൃതർ ഇക്കാര്യം വ്യക്തമാക്കിയത്.

ഹോട്ടൽ ദുരന്തനിവാരണനിയമപ്രകാരം ഏറ്റെടുത്തതാണെന്നും അതിനാൽ പ്രതിഫലം നൽകില്ലെന്നുമാണ് മറുപടിയിൽ പറയുന്നത്. ഒന്നരമാസത്തോളമായി ആരോഗ്യപ്രവർത്തകർ താമസിക്കുന്നതിന്റെ ഭാഗമായുള്ള വാടകക്കുടിശ്ശിക ഒൻപത് ലക്ഷത്തോളം രൂപയാണ്.

ഏറ്റവും ചുരുങ്ങിയത് വെള്ളം വൈദ്യുതി, ചാർജുകളിലെങ്കിലും ഇളവു നൽകണമെന്നാണ് ഹോട്ടലുടമകളുടെ ആവശ്യം.സംസ്ഥാനത്ത് എല്ലാ ജില്ലകളിലും ഇത്തരത്തിൽ ഇരുപത്തിയഞ്ചോളം ഹോട്ടലുകളിൽ ആരോഗ്യപ്രവർത്തകർക്ക് താമസ സൗകര്യമേർപ്പെടുത്തിയിട്ടുണ്ട്. ഇതിന് പുറമെ ക്വാറന്റൈൻ കേന്ദ്രങ്ങൾക്കായും നൂറോളം ഹോട്ടലുകൾ കണ്ടെത്തിയിട്ടുണ്ട്. എന്നാൽ പ്രതിഫലക്കാര്യത്തിൽ അന്തിമതീരുമാനം എടുത്തിട്ടില്ലെന്നാണ് ചുമതലയുള്ള ഉന്നത ഉദ്യോഗസ്ഥരുടെ നിലപാട്.