ദുബായ്: ദുബായിൽ ചെറിയ രോ​ഗ ലക്ഷണങ്ങളുള്ളതും പ്രകടമായ ലക്ഷണങ്ങളില്ലാത്തതുമായ കൊവിഡ് രോ​ഗികൾക്ക് വീട്ടിൽ തന്നെ ഐസൊലേഷനിൽ തുടരാമെന്ന് ദുബായ് ആരോ​ഗ്യ വകുപ്പ് അറിയിച്ചു. ഇതുമായി ബന്ധപ്പെട്ട് നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്മെൻ്റ് അതോറിറ്റിയുമായി ചേർന്ന് ആരോഗ്യവകുപ്പ് സർക്കുലർ പുറത്തിറക്കി.

ചുമ, തൊണ്ട വേദന, തലവേദന, പേശി വേദന, ക്ഷീണം തുടങ്ങിയവയാണ് ചെറിയ

രോ​ഗലക്ഷണങ്ങളുടെ പട്ടികയിൽ ഉൾപ്പെടുത്തിയിട്ടുള്ളത്.

ആശുപത്രികളിൽ രോഗികളുടെ എണ്ണം ക്രമാതീതമായി വർദ്ധിക്കുന്നത് കൊണ്ടാണ് മാർഗനിർദ്ദേശങ്ങൾ പുതുക്കുന്നതെന്ന് ദുബായ് കൊവിഡ് ടാസ്ക് ഫോഴ്സിലെ ഡോക്ടറായ ആദിൽ മുഹമ്മദ് യാസിൻ അൽ സിസി പറഞ്ഞു.

പുതുക്കിയ ​നിർദ്ദേശങ്ങൾ പ്രകാരം കൊവിഡ് രോ​ഗികളെ അഞ്ചായാണ് തരം തിരിച്ചിരിക്കുന്നത്. പ്രകടമായ രാേ​ഗ ലക്ഷണം ഇല്ലാത്തവർ, ചെറു രോ​ഗ ലക്ഷണമുള്ളവർ, മോഡറേറ്റ്, സിവിയർ, ക്രിട്ടിക്കൽ എന്നിങ്ങനെയാണ് ഈ വേർതിരിവ്.

ഒന്നാമത്തെയും രണ്ടാമത്തെയും വിഭാ​ഗത്തിൽപ്പെടുന്ന രോ​ഗികൾക്ക് തങ്ങളുടെ ഇഷ്ടപ്രകാരം വീടുകളിൽ ഐസലേഷനിൽ ഇരിക്കുകയോ ആശുപത്രികളോട് സമീപമുള്ള ഹോട്ടലുകളിലെ ക്വാറൻ്റൈൻ മുറികളിൽ താമസിക്കുകയോ ചെയ്യാം. എല്ലാ പ്രധാന ആശുപത്രികളും തങ്ങളുടെ കെട്ടിടത്തിനോട് ചേർന്നുള്ള ഹോട്ടലുകളിൽ ക്വാറൻ്റൈൻ സൗകര്യം ഒരുക്കിയിട്ടുണ്ട്.