ബംഗളൂരു: ബംഗളൂരുവിൽ മലയാളി യുവതി ആട്ടോറിക്ഷയിൽ പ്രസവിച്ചു. കണ്ണൂർ പഴയങ്ങാടി സ്വദേശിനിയായ 27കാരിക്കാണ് ദുരനുഭവമുണ്ടായത്. ബംഗളൂരുവിലെ ഗോരേപാളയയിൽ താമസിക്കുന്ന ഇവർ പ്രസവവേദനയെ തുടർന്ന് ശനിയാഴ്ച രാത്രിയിലാണ് അമ്മയ്ക്കും സഹോദരനുമൊപ്പം ആശുപത്രിയിലേക്ക് തിരിച്ചത്. എന്നാൽ, കൊവിഡ് സംശയത്താൽ ആശുപത്രി അധികൃതർ അഡ്മിറ്റ് ചെയ്തില്ല.അഞ്ച് ആശുപത്രികളിൽ പോയെങ്കിലും എല്ലാവരും മുഖം തിരിച്ചു. ഒടുവിൽ അർദ്ധരാത്രിയിൽ വഴിമദ്ധ്യേ സിദ്ധാപുരയിൽ വച്ച് ആട്ടോറിക്ഷയ്ക്കുള്ളിൽ പ്രസവിക്കുകയായിരുന്നു. വിവരമറിഞ്ഞെത്തിയ മലയാളി സംഘടനകളുടെ സഹായത്തോടെ യുവതിയേയും കുഞ്ഞിനേയും ബംഗളൂരു കിംസ് ആശുപത്രിയിൽ പ്രവേശിപ്പിച്ചു. അമ്മയും കുഞ്ഞും സുഖമായിരിക്കുന്നെന്നും ആരോഗ്യപ്രശ്നങ്ങളില്ലെന്നും കിംസ് അധികൃതർ അറിയിച്ചു. യുവതിയെ സന്ദർശിച്ച ചാമരാജ്പ്പേട്ട് എം.എൽ.എ സമീർ അഹമ്മദ് ഖാൻ അടിയന്തിര ധനസഹായം നൽകി.