പുതിയതരം ഭക്ഷണങ്ങൾ ഉണ്ടാക്കാനും അത് ഒരു തവണയെങ്കിലും പരീക്ഷിക്കാൻ ആഗ്രഹിക്കുന്നവരാണ് നമ്മൾ മലയാളികൾ. പലതരത്തിലുള്ള ഭക്ഷണങ്ങൾ നമ്മൾ വീട്ടിൽ പരീക്ഷിച്ച് നോക്കാറുമുണ്ട്. ചെമ്മീൻ ബിരിയാണി നമ്മൾ കഴിച്ചിട്ടുള്ള ഒന്നാണ്. ചിലപ്പോഴെങ്കിലും അതൊന്ന് വീട്ടിൽ പരീക്ഷിച്ച് നോക്കാൻ ആഗ്രഹിക്കാത്തവരായി ആരും കാണില്ല,​ അപ്പോൾ പിന്നെ ഈ റംസാൻ കാലത്ത് ചെമ്മീൻ ബിരിയാണി പരീക്ഷിച്ച് നോക്കിയാലോ?​

ആവശ്യമുള്ള സാധനങ്ങൾ

ബിരിയാണി അരി - ഒരു കിലോ

ചെമ്മീൻ - ഒരു കിലോ

സവാള - 4 എണ്ണം

ഇഞ്ചി വെളുത്തുള്ളി പേസ്റ്റ് - 4സ്പൂൺ

പച്ചമുളക് - 6 എണ്ണം

മുളക് പൊടി - 2ടീസ്പൂൺ

മഞ്ഞള്‍പ്പൊടി - 1 സ്പൂൺ

ഗരം മസാല - 2 സ്പൂൺ

നാരങ്ങ നീര് - 2സ്പൂൺ

ഉപ്പ് - പാകത്തിന്

കറിവേപ്പില- രണ്ട് തണ്ട്

മല്ലിയില- പാകത്തിന്

പട്ട, ഗ്രാമ്പൂ, ഏലക്ക, തക്കോലം, അണ്ടിപ്പരിപ്പ്, മുന്തിരി, നെയ്യ്.

തയാറാക്കുന്ന വിധം ചെമ്മീൻ വൃത്തിയായി കഴുകിയ ശേഷം അൽപം മുളക് പൊടി, മഞ്ഞൾപ്പൊടി, ഉപ്പ്, നാരങ്ങ നീര് എന്നിവ പുരട്ടി അരമണിക്കൂറോളം വെക്കുക. ഒരു പാനിൽ അൽപം വെളിച്ചെണ്ണയൊഴിച്ച് സവാള, ഇഞ്ചി, വെളുത്തുള്ളി പേസ്റ്റ്, പച്ചമുളക് എന്നിവയെല്ലാം കൂടി വഴറ്റിയെടുക്കാം. നല്ലതു പോലെ വഴറ്റിക്കഴിഞ്ഞാൽ ഇതിലേക്ക് മുളക് പൊടി, ഉപ്പ്, മഞ്ഞൾപ്പൊടി, ഗരം മസാല എന്നിവയും ചേർക്കാം. ശേഷം മസാല പുരട്ടി വെച്ചിരിക്കുന്ന ചെമ്മീൻ ഇതിലേക്ക് ചേർത്ത് വേവിക്കുക. പിന്നീട് കറിവേപ്പില, മല്ലിയില എന്നിവ ചെമ്മീനിലേക്ക് ചേർക്കാം. കുക്കറിൽ അൽപം നെയ്യ് ഒഴിച്ച് അതിലേക്ക് പട്ട, ഗ്രാമ്പൂ, ഏലക്ക, തക്കോലം എന്നിവ ഇട്ട് ഒരു ഗ്ലാസ്സ് അരിക്ക് ഒന്നര ഗ്ലാസ്സ് വെള്ളം എന്ന അളവിൽ അരിയും ഉപ്പും ഇട്ട് വേവിക്കാം. ഒരു വിസിൽ വന്ന ഉടനേ അടുപ്പിൽ നിന്ന് മാറ്രി വെച്ച് 15 മിനിറ്റിന് ശേഷം തുറന്ന് ഇതിലേക്ക് മല്ലിയില ചേർക്കാം. അവസാന ഘട്ടം എന്ന നിലക്ക് ഒരു പാത്രത്തിൽ തയ്യാറാക്കി വെച്ചിരിക്കുന്ന ചെമ്മീൻ മസാല ചേർക്കാം. അതിനു മുകളിൽ അൽപം ചോറിടാം. പിന്നീട് അണ്ടിപ്പരിപ്പ്, സവാള, മുന്തിരി, മല്ലിയില എന്നിവയും ചേർക്കാം.അതിന് ശേഷം കുറച്ച് കൂടി ചെമ്മീൻ മസാല ചേർത്ത് അതിന് മുകളിൽ ചോറിട്ട് ലെയറായി അടുക്കാവുന്നതാണ്. പിന്നീട് സെറ്റ് ആയിക്കിട്ടാൻ കനലിനു മുകളില്‍ 10 മിനിറ്റ് വെയ്ക്കാം. ചെമ്മീൻ ബിരിയാണി റെഡി.