വാഷിംഗ്ടൺ: ഭരണസിരാകേന്ദ്രമായ വൈറ്റ് ഹൗസിലും കൊവിഡ് എത്തിയതോടെ ഭയപ്പാടിലാണ് അമേരിക്കൻ ജനത. പ്രസിഡന്റ് ഡൊണാൾഡ് ട്രംപിന്റെ സുരക്ഷാ ഉദ്യോഗസ്ഥനും വൈസ് പ്രസിഡന്റ് മൈക്ക് പെൻസിന്റെ പ്രസ് സെക്രട്ടറിയായ കാറ്റി മില്ലറിനുമടക്കം മൂന്ന് വൈറ്റ് ഹൗസ് ജീവനക്കാർക്ക് കൊവിഡ് സ്ഥിരീകരിച്ചിരുന്നു. കൊവിഡ് ടാസ്ക് ഫോഴ്സിലെ ഉന്നത ഉദ്യോഗസ്ഥരായ ഡോ.ആന്റണി ഫൗച്ചി, റോബർട്ട് റെഡ്ഫീൽഡ്, സ്റ്റീഫൻ ഹാൻ എന്നിവർ കൊവിഡ് രോഗിയുമായി അടുത്തിടപഴകിയത് മൂലം ക്വാറന്റൈനിലാണ്. എന്നാൽ, തങ്ങൾ വീട്ടിലിരുന്ന് ജോലികൾ തുടരുമെന്നും മറ്റുള്ളവരുമായി സംമ്പർക്കം പുലർത്തേണ്ടാത്ത സാഹചര്യത്തിൽ മാസ്ക് ധരിച്ച് താൻ ഓഫിസിൽ പോകുമെന്നും ഫൗച്ചി പറഞ്ഞു.

അതേസമയം, യു.എസ് രഹസ്യാന്വേഷണ വിഭാഗത്തിലെ 11ഓളം ഉദ്യോഗസ്ഥർക്ക് കൊവിഡ് സ്ഥിരീകരിച്ചെന്നും 60 പേർ ക്വാറന്റൈനിലാണെന്നും റിപ്പോർട്ടുകളുണ്ട്.

 ഇതിനിടെ, വൈസ് പ്രസിഡന്റ് മൈക്ക് പെൻസ് ക്വാറന്റൈനിലാണെന്ന വാർത്തകളെ വൈറ്റ് ഹൗസ് തള്ളി. പെൻസ് ഇന്നലെ വൈറ്റ് ഹൗസിൽ എത്തിയെന്നും മെഡിക്കൽ സംഘത്തിന്റെ നിർദ്ദേശപ്രകാരമുള്ള ചിട്ടകൾ അദ്ദേഹം പാലിക്കുന്നുണ്ടെന്നും വൈറ്റ് ഹൗസ് വൃത്തങ്ങൾ അറിയിച്ചു.പെൻസിനും ട്രംപിനും എന്നും കൊവിഡ് പരിശോധന നടത്താറുണ്ടെന്നും രണ്ടു പേരുടേയും ഫലം നെഗറ്റീവാണെന്നും അവർ കൂട്ടിച്ചേർത്തു.