ധുംക: ഝാർഖണ്ഡിലെ ധുംക ഗ്രാമത്തിൽ ആടിനെ മോഷ്​ടിച്ചുവെന്നാരോപിച്ച്​ ആൾക്കൂട്ടം യുവാവിനെ തല്ലിക്കൊന്നു. രണ്ട്​ യുവാക്കളെ പ്രദേശവാസികൾ കെട്ടിയിട്ട്​ അടിച്ചെങ്കിലും ഗുരുതര പരിക്കേറ്റ സുബാൻ അൻസാരിയാണ് (26) മരിച്ചത്​. അൻസാരിയുടെ സുഹൃത്ത്​ ദുലാൽ മിർധ (22) ആശുപത്രിയിലാണ്.

അയൽഗ്രാമമായ കാതികുണ്ഡിൽ നിന്നും ആടിനെ മോഷ്​ടിച്ചുവെന്നാരോപിച്ച്​ ആൾക്കൂട്ടം ഇവരെ പിടികൂടുകയായിരുന്നു. ഗ്രാമത്തിന് പുറത്തുള്ള സ്ഥലത്ത്​ യുവാക്കൾ ആടിനെ വെട്ടുന്നത്​ കണ്ടതായി പ്രദേശവാസികൾ പ്രചരിപ്പിച്ചതോടെ ആൾക്കൂട്ടം ഇവരെ വളഞ്ഞിട്ട്​ പിടികൂടുകയായിരുന്നു. തടിച്ചുകൂടിയ ആളുകൾ ഇരുവരെയും ഗ്രാമത്തിലേക്ക് വലിച്ചിഴച്ച് കൊണ്ടുപോയി മരത്തിൽ കെട്ടിയിട്ട്​ ക്രൂരമായി മർദിച്ചു.

കൊലപാതകത്തിൽ എഫ്​.ഐ.ആർ രജിസ്​റ്റർ ചെയ്​തതായി ധുംക പൊലീസ് സൂപ്രണ്ട് അംബർ ലക്ദ അറിയിച്ചു. അതേസമയം,​ കൊല്ലപ്പെട്ട അൻസാരിക്കെതിരെയും സുഹൃത്തിനെതിരെയും മോഷണക്കുറ്റത്തിനും​ കേസെടുത്തിട്ടുണ്ട്​.