തിരുവനന്തപുരം : ടിക് ടോക് പൊരിക്കൽ വീഡിയോകളിലൂടെ കഴിഞ്ഞ ദിവസങ്ങളിൽ സോഷ്യൽ മീഡിയയിൽ ചർച്ചയായ യു ട്യൂബറാണ് അ‌‌‌‌ർജുൻ എന്ന യുവാവ്. യുട്യൂബില്‍ ഇൻസ്റ്റന്‍റ് ഹിറ്റായ വീഡിയോകളായിരുന്നു അര്‍ജ്ജുൻ ചെയ്ത ടിക് ടോക് റിയാക്ഷനുകള്‍. കഴിഞ്ഞ രണ്ടാഴ്ചയ്ക്കുള്ളിലാണ് സബ്സ്ക്രൈബേഴ്‍സിന്‍റെ എണ്ണത്തിലും കാണികളുടെ എണ്ണത്തിലും ചാനല്‍ റെക്കോര്‍ഡ് ഇട്ടത്. 'ടിക് ടോക് റോസ്റ്റിംഗ്' എന്ന പേരില്‍ ആരംഭിച്ച റിയാക്ഷന്‍ വീഡിയോകളില്‍ ചിലത് 40 ലക്ഷത്തിലധികം കാണികളെ നേടി.
പല ടിക് ടോക് താരങ്ങളും അര്‍ജ്ജുന്‍റെ 'റോസ്റ്റിംഗി'ന് വിധേയരായിരുന്നു. ടിക് ടോകിൽ ഏറെ ഫോളോവേഴ്സ് ഉള്ളവരാണ് ഇതിൽ പലരും. ബിഗ് ബോസ് താരം ഫുക്രുവും അതില്‍ ഉള്‍പ്പെടും. ഫുക്രുവിന്‍റെ ഒരു ഡാന്‍സ് വീഡിയോയ്ക്ക് അര്‍ജ്ജുന്‍ ഒരു എപ്പിസോഡില്‍ റിയാക്ഷന്‍ നല്‍കിയിരുന്നു. ഇപ്പോഴിതാ അതിനുള്ള തന്‍റെ മറുപടി ഒരു വീഡിയോയിലൂടെത്തന്നെ നല്‍കിയിരിക്കുകയാണ് ഫുക്രു.
അര്‍ജ്ജുന്‍റെ റിയാക്ഷന്‍ വീഡിയോയുടെ മാതൃകയില്‍ ഒരു ട്രോള്‍ വീഡിയോ ഉണ്ടാക്കിയിരിക്കുകയാണ് ഫുക്രു. കൂടാതെ അര്‍ജ്ജുന്‍റെ അവതരണത്തില്‍ നെഗറ്റീവ് എന്ന് തനിക്ക് തോന്നിയ കാര്യങ്ങളും ഫുക്രു ചൂണ്ടിക്കാട്ടുന്നു. ഒരു റിയാക്ഷന്‍ വീഡിയോയില്‍ അര്‍ജ്ജുന്‍ തന്‍റെ കൈയ്യിലുള്ള പാവയോട് സംസാരിക്കുന്നുണ്ട്. ഇത് കാണുമ്പോള്‍ മറ്റൊരാളെ ഓര്‍മ്മ വരുന്നെന്നാണ് രജിത് കുമാറിനെക്കുറിച്ച് സൂചിപ്പിച്ച് ഫുക്രുവിന്‍റെ റിയാക്ഷന്‍.