ന്യൂഡല്‍ഹി: ഇന്ത്യയിൽ കൊവിഡ് രോഗികളുടെ എണ്ണം 85000 കടന്നു. ഇതോടെ രോഗികളുടെ എണ്ണത്തിൽ ഇന്ത്യ ചൈനയെ മറികടന്നു. ലോകത്ത് കൊവിഡ് രോഗബാധിതരുടെ എണ്ണത്തില്‍ ഇന്ത്യ 11ാം സ്ഥാനത്തെത്തി.
ഇന്ത്യയില്‍ ഇതുവരെ 85,605 പേര്‍ക്കാണ് കൊവിഡ് സ്ഥിരീകരിച്ചത്. 2746 പേര്‍ മരിക്കുകയും ചെയ്തു. അതേസമയം ചൈനയുടെ അത്രയും മരണനിരക്ക് ഇന്ത്യയിലില്ല. 3.2 ശതമാനമാണ് ഇന്ത്യയുടെ മരണനിരക്ക്. ചൈനയില്‍ ഇത് 5.5 ശതമാനമാണ്. രാജ്യത്ത് ഇതുവരെ 27,000 ത്തില്‍ അധികം പേര്‍ രോഗമുക്തി നേടിയതായും ആരോഗ്യ മന്ത്രാലയം അറിയിച്ചു. ചൈനയില്‍ ഇതുവരെ 82,933 പേര്‍ക്കാണ് കൊവിഡ് സ്ഥിരീകരിച്ചത്. ഇതില്‍ 4633 പേര്‍ മരിച്ചു.
45 ലക്ഷത്തിലധികം പേര്‍ക്കാണ് ലോകത്ത് ഇതുവരെ കൊവിഡ് ബാധിച്ചത്. മൂന്നുലക്ഷത്തിലധികം പേര്‍ മരിക്കുകയും ചെയ്തു. 17,27,999 പേരാണ് രോഗമുക്തി നേടിയത്. യു.എസിലാണ് ഏറ്റവും കൂടുതല്‍ കൊവിഡ് രോഗികളുള്ളത്. 14,63,301 പേര്‍ക്കാണ് യു.എസില്‍ കൊവിഡ് ബാധിച്ചത്. 87,248 പേരാണ് യു.എസില്‍ മരിച്ചത്. സ്പെയിനില്‍ 2,74,367 പേര്‍ക്കും റഷ്യയില്‍ 2,62,843 പേര്‍ക്കും കൊവിഡ് സ്ഥിരീകരിച്ചിട്ടുണ്ട്.