എറണാകുളം: സാമൂഹിക അകലം പാലിക്കാതെ കുട്ടികൾക്ക് മാസ്കുകൾ വിതരണം ചെയ്ത സംഭവത്തിൽ റോജി എം ജോൺ എം.എൽ.എ ഉൾപ്പെടെയുളളവരെ പ്രതിയാക്കി പൊലീസ് കേസെടുത്തു. കാലടി ബ്ലോക്ക് ഡിവിഷനിൽപ്പെട്ട അഞ്ച് മുതൽ 12 വരെ വാർഡുകളിലെ കുട്ടികൾക്കാണ് സാമൂഹിക അകലം പാലിക്കാതെ ജനപ്രതിനിധികൾ അടക്കമുളള പ്രാദേശിക കോൺഗ്രസ് നേതൃത്വം മാസ്ക് വിതരണം നടത്തിയത്. കൈക്കുഞ്ഞുങ്ങളുമായെത്തിയ അമ്മമാരടക്കം നൂറോളം പേരാണ് പങ്കെടുത്തത്.
ബ്ലോക്ക് പ‌ഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർമാൻ ടി.പി ജോർജ് സംഘടിപ്പിച്ച പരിപാടിയിൽ റോജി എം ജോൺ എം.എൽ.എ ആയിരുന്നു മുഖ്യാതിഥി. പരിപാടി സംഘടിപ്പിച്ച ടി.പി ജോർജിനെ ഒന്നാം പ്രതിയും റോജി എം ജോൺ എം.എൽ.എയെ രണ്ടാം പ്രതിയുമാക്കിയാണ് കേസെടുത്തത്. കണ്ടാലറിയാവുന്ന ബാക്കിയുളളവർക്കെതിരെയും നിയമനടപടിയുണ്ട്.