ചെന്നൈ: തമിഴ്നാട്ടിൽ മദ്യശാലകൾ തുറന്നു. പൊലീസ് സുരക്ഷയോടെയാണ് റെഡ്സോൺ മേഖല ഉൾപ്പെടെയുള്ള സ്ഥലങ്ങളിൽ മദ്യവിൽപ്പനശാലകൾ തുറന്നത്. കർശനമായ സാമൂഹിക അകലം പാലിച്ച് ചില മദ്യഷോപ്പുകൾ തുറന്ന് പ്രവർത്തിക്കാനുള്ള അനുവാദം സംസ്ഥാനങ്ങൾക്ക് കേന്ദ്രസർക്കാർ നൽകിയിരുന്നു. തിരക്ക് ഒഴിവാക്കുന്നതിനും സാമൂഹിക അകലം ഉറപ്പാക്കുന്നതിനും സ്വീകരിച്ച നടപടികളുടെ ഭാ​ഗമായി മദ്യം വാങ്ങാനെത്തുന്നവർക്കായി ടോക്കൺ സംവിധാനം ഏർപ്പെടുത്തിയിട്ടുണ്ട്. ദിവസങ്ങൾക്ക് ശേഷം മദ്യശാലകൾ തുറന്ന് പ്രവർത്തിച്ചതിനാൽ തന്നെ അനിയന്ത്രിതമായ തിരക്കാണ് അനുഭവപ്പെടുന്നത്. ടോക്കണുകളുടെ എണ്ണം പരിമിതപ്പെടുത്തുകയും ചെയ്തിട്ടുണ്ട്.

രാവിലെ 10 മുതൽ 5 വരെയാണ് കടകളുടെ പ്രവർത്തന സമയം. തുറന്ന മദ്യഷോപ്പുകള്‍ക്ക് മുന്നില്‍ കൂടുതൽ പൊലീസ് ഉദ്യോ​ഗസ്ഥരെ വിന്യസിക്കുകയും ചെയ്തു. ലോക്ക് ഡൗൺ ഇളവുകളെ തുടർന്ന് തുറന്ന മദ്യശാലകൾ അടയ്ക്കണമെന്ന മദ്രാസ് ഹൈക്കോടതിയുടെ ഉത്തരവ് സുപ്രീം കോടതി സ്റ്റേ ചെയ്തതിനെ തുടർന്നാണ് മദ്യശാലകൾ തുറന്നത്. കഴിഞ്ഞ മാര്‍ച്ച് 24 മതല്‍ സംസ്ഥാനത്ത് മദ്യവില്‍പ്പന ശാലകള്‍ അടച്ചിരിക്കുകയായിരുന്നു.