ന്യൂഡൽഹി: കൊവിഡിനെതിരായ പോരാട്ടത്തിന് ശക്തി പകരാൻ ഇന്ത്യയ്ക്ക്​ വെന്റിലേറ്ററുകൾ സംഭാവന ചെയ്യുമെന്ന് യു.എസ് പ്രസിഡന്റ്​ ഡോണൾഡ് ട്രംപ് ട്വിറ്ററിലൂടെ അറിയിച്ചു. ഈ മഹാമാരിയുടെ കാലത്ത് അമേരിക്ക ഇന്ത്യയോടും പ്രധാനമന്ത്രി നരേന്ദ്ര മോദിയോടുമൊപ്പമുണ്ടെന്നും അദ്ദേഹം പറഞ്ഞു.

‘‘ഇന്ത്യയിലെ സുഹൃത്തുക്കൾക്ക് അമേരിക്ക വെന്റിലേറ്ററുകൾ സംഭാവന ചെയ്യുമെന്ന് പ്രഖ്യാപിക്കുന്നതിൽ ഞാൻ അഭിമാനിക്കുന്നു. ഈ പകർച്ചവ്യാധിയുടെ സമയത്ത് ഞങ്ങൾ ഇന്ത്യയോടും നരേന്ദ്രമോദിയോടും ഒപ്പം നിൽക്കുന്നു. വാക്സിൻ വികസനത്തിനും സഹകരിക്കുന്നു. നാം ഒരുമിച്ച് അദൃശ്യ ശത്രുവിനെ തോൽപ്പിക്കും.’’ - ട്രംപ്​ ട്വീറ്റിൽ പറഞ്ഞു.

ഏകദേശം 10 ലക്ഷം രൂപ വില വരുന്ന 200 മൊബൈൽ വെന്റിലേറ്ററുകളാണ് യു.എസ് ഇന്ത്യയിലേക്ക് അയക്കുന്നത്

കയറ്റുമതി ചെയ്യുന്നത്. മെയ് മാസം അവസാനവാരമോ ജൂൺ ആദ്യവാരമോ വെന്റിലേറ്ററുകൾ ഇന്ത്യയിൽ എത്തും.

അതേസമയം വർഷാവസാനത്തോടെ കൊവിഡ്​ വാക്സിൻ ലഭ്യമാകുമെന്ന് പ്രതീക്ഷയുണ്ടെന്ന് ട്രംപ് മാദ്ധ്യമങ്ങളോട്​ പറഞ്ഞു. മുൻ ഫാർമസ്യൂട്ടിക്കൽ എക്സിക്യൂട്ടീവിനെ നിയമിച്ചുകൊണ്ട്​ ‘‘ഓപ്പറേഷൻ റാപ്​ സ്പീഡ്” എന്ന പ്രോജക്ടിന് കീഴിൽ വാക്​സിൻ കണ്ടെത്താനുള്ള നടപടികൾ ത്വരിതപ്പെടുത്തിയതായും അദ്ദേഹം അറിയിച്ചു.

നന്ദി പറഞ്ഞ് മോദി

കൊവിഡ് പ്രതിരോധത്തിൽ ഇന്ത്യയ്ക്ക് സഹായം നൽകുമെന്ന് പ്രഖ്യാപിച്ച യു.എസ് പ്രസിഡന്റിന് നന്ദി പറഞ്ഞ് മോദി. ഈ മഹാമാരിയെ നാം ഒരുമിച്ച് നേരിടേണ്ടതുണ്ട്. ലോകത്തെ ആരോഗ്യകരവും കൊവിഡ് മുക്തവുമാക്കാൻ എല്ലാ രാജ്യങ്ങളും ഒന്നിച്ച് പ്രവർത്തിക്കണം. ഇന്ത്യ-അമേരിക്ക സൗഹൃദം കൂടുതൽ ദൃഢമാവുന്നുവെന്ന് ട്രംപിന്റെ ട്വീറ്റ് പങ്കുവെച്ചുകൊണ്ട് പ്രധാനമന്ത്രി മോദി ട്വിറ്ററിൽ കുറിച്ചു.