പുതിയ സംവിധായകർ, പുതിയ എഴുത്തുകാർ. രണ്ടാം വരവിൽ അധികവും പുതുതലമുറയോടൊപ്പമാണല്ലേ ?
രണ്ടും ഒരേ അളവിൽ ചെയ്യുന്നതുപോലെയാണ് എനിക്ക് തോന്നുന്നത്. സത്യൻ അങ്കിൾ, കമൽ സാർ, പ്രിയൻ സാർ, റോഷൻ അങ്ങനെയും ചെയ്തു. ആഷിക് അബു, രാജേഷ് പിള്ള എന്നിവരുടെ സിനിമയുടെയും ഭാഗമായി.പുതിയ കുട്ടികളുടെ സിനിമകളാണ് ജോ ആൻഡ് ദ ബോയ്, കെയർ ഒഫ് സൈറബാനു, ഉദാഹരണം സുജാത.ഇതിനിടയിൽ ഒരു സിനിമ വിട്ടു പോയി... ലൂസിഫർ. ലൂസിഫർ ചെയ്തത് പുതുമുഖ സംവിധായകനാണല്ലോ.ഇപ്പോൾ ചെയ്യുന്ന സിനിമയുടെ സംവിധായകർ രണ്ടും നവാഗതരാണ്. എണ്ണം നോക്കുമ്പോൾ രണ്ട് ശ്രേണിയിലെയും സംവിധായകരുടെ സിനിമകളിൽ ഒരേപോലെ ഭാഗമാവുന്നു.അത് ബോധപൂർവം ചെയ്യുന്നതല്ല. സംഭവിക്കുന്നതാണ്. ഇപ്പോൾ ചോദിച്ചപ്പോഴാണ് ഞാൻ പോലും അതേപ്പറ്റി ആലോചിക്കുന്നത്. പുതുമുഖ സംവിധായകൻ, അനുഭവസമ്പത്തുള്ള സംവിധായകൻ എന്നത് മാനദണ്ഡമായി നോക്കാറില്ല. തിരക്കഥ ഇഷ്ടപ്പെടുകയും വിശ്വാസമുള്ള സംവിധായകനാണെന്ന് തോന്നുകയും ചെയ്താൽ തീർച്ചയായും അതിന്റെ ഭാഗമാവും .അതേ ഞാൻ നോക്കാറുള്ളൂ.
സാധാരണക്കാരുടെ ഓരം ചേർന്ന് നിൽക്കുന്ന കഥാപാത്രമായി മഞ്ജു എത്തുമ്പോൾ
ഹൃദ്യത അനുഭവപ്പെടുന്നു. ഉദാഹരണം
നിരുപമ, സുജാത, മാധുരി?
ആണോ?...അത് ഞാനാണോ പറയേണ്ടത്.ഓരോ കഥാപാത്രവുമായി പ്രേക്ഷകർക്കുള്ള ബന്ധത്തെ അടിസ്ഥാനമാക്കിയാണത്. ചെയ്യുന്ന എല്ലാ കഥാപാത്രങ്ങളും പ്രേക്ഷർക്ക് ഇഷ്ടപ്പെടണമെന്നാണ് എന്റെ ആഗ്രഹം. ലൂസിഫറി ലെ കഥാപാത്രത്തിന് ഒരു സാധാരണക്കാരിയുടെ ജീവിതമല്ല. എന്നാൽ വലിയ രീതിയിൽ അത് സ്വീകരിക്കപ്പെട്ടു. അസുരനിലെ കഥാപാത്രം ഏറ്റവും സാധാരണക്കാരിയായിരുന്നു. പ്രതി പൂവൻ കോഴിയിലെ മാധുരിയും ഏറ്റവും സാധാരണക്കാരി. വൈവിദ്ധ്യമാർന്ന കഥാപാത്രങ്ങൾ ചെയ്യാൻ സാധിച്ചിട്ടുണ്ട്. രണ്ടും ഒരേ രീതിയിൽ സ്വീകരിക്കപ്പെടുക എന്നതാണ് ഒരു നടി എന്ന നിലയിൽ എന്റെ മുന്നിലെ വെല്ലുവിളി.
ഇപ്പോൾ അഭിനയിക്കുന്നത് ഹൊറർ
ചിത്രത്തിലാണല്ലോ?
ഒരു ഹൊറർ ത്രില്ലർ സിനിമയുടെ ഭാഗമാവുന്നത് ആദ്യമാണ്. അതിന്റെ ആകാംക്ഷയുണ്ട്. ആ സിനിമ ഷൂട്ട് ചെയ്യുന്ന രീതിയും സാഹചര്യങ്ങളുമെല്ലാം വ്യത്യസ്തമാണ്. ഇതിൽ സാധാരണ പോലെ മറഞ്ഞു നിന്ന് പേടിപ്പിക്കുന്ന പ്രേതമല്ല. അതിന്റെ പുതുമയുണ്ട്. അത് ഞാൻ ആസ്വദിക്കുന്നു.
വീട്ടിൽ നിന്ന് ഒരു സംവിധായകൻ
വരികയാണ്?
ചേട്ടൻ( മധു വാര്യർ) ഒരുപാട് വർഷമായി ഇതിനു പിന്നാലെയാണ്. ഉണ്ടായിരുന്ന ജോലി ഉപേക്ഷിച്ചതു തന്നെ സിനിമ ചെയ്യാനായിരുന്നു. അത്രമാത്രം സിനിമയോട് ഇഷ്ടവും പാഷനുമാണ്. എന്നാൽ എങ്ങും എത്താതെ സ്ട്രഗിൾ ചെയ്യുന്ന ചേട്ടനെ ഞാൻ നേരിട്ട് കണ്ടു. ചേട്ടന്റെ പല പ്രോജക്ടും അവസാനഘട്ടത്തിൽ എത്തിയശേഷം നഷ്ടപ്പെടുന്നതും കണ്ടിട്ടുണ്ട്. ഇപ്പോൾ എല്ലാം ഒത്തുവന്നു. അതിന്റെ സന്തോഷമുണ്ട്. ചേട്ടൻ നന്നായി ചെയ്യണേ എന്ന ആഗ്രഹമുണ്ട്. ചേട്ടന്റെ സിനിമയിൽ ഞാനും ഭാഗമാണെന്നത് സന്തോഷം തരുന്നു.
മമ്മൂട്ടിയും മഞ്ജുവും ഇതുവരെ ഒത്തഭിനയിക്കാത്തതെന്താണെന്ന് ആലോചിക്കാത്ത പ്രേക്ഷകരില്ല?
അത് യാഥാർത്ഥ്യമാകാൻ പോകുകയാണ്.ഒരുപാട് വർഷമായുള്ള ആഗ്രഹമായിരുന്നു . അഭിനയം തുടങ്ങിയ സമയത്തും ആഗ്രഹിച്ചു. രണ്ടാം വരവിൽ ഇപ്പോഴാണ് യാഥാർത്ഥ്യമാകുന്നത്. മമ്മുക്കയോടൊപ്പം അഭിനയിക്കാൻ കഴിയാതെയിരുന്നതിന് പല കാരണങ്ങൾ ഉണ്ടാവാം. പല പ്രോജക്ടും ഇപ്പോൾ സംഭവിക്കുമെന്ന് തോന്നുകയും അവസാന നിമിഷം മാറിപോവുകയും ചെയ്യാറുണ്ട്. ഇപ്പോഴാണ് എല്ലാം ഒത്തുവന്നത്. അതിൽ എനിക്ക് ഭയങ്കര സന്തോഷമുണ്ട്.
'96' സിനിമയിൽ ജാനു ആവേണ്ടത് മഞ്ജു ആയിരുന്നെന്ന് കേട്ടു?
'96" ഇറങ്ങിയശേഷമാണ് ഞാൻ അത് അറിയുന്നത്. ഒരു അവാർഡ് ദാന ചടങ്ങിൽ 96 ന്റെ സംവിധായകൻ പ്രേംകുമാറാണ് എന്നോട് ഇത് പറയുന്നത്. ആദ്യം പരിഗണിച്ചത് എന്നെയായിരുന്നെന്നും എന്നാൽ എത്തിച്ചേരാൻ കഴിഞ്ഞില്ലെന്നും പറഞ്ഞു. അവർക്ക് ഡേറ്റ് പ്രശ്നവുമുണ്ടായിരുന്നു. എന്നെ കൂടി അതിലേക്ക് വലിച്ചിടേണ്ടായെന്നും തീരുമാനിച്ചു. അതിനാൽ അവർ സമീപിച്ചില്ല. എന്നെ അവർ പരിഗണിച്ചുവെന്ന് കേട്ടപ്പോൾ സന്തോഷം തോന്നി. ഓരോ സിനിമയ്ക്കും ഓരോ വിധിയുണ്ട്. അതുപോലെയെ സംഭവിക്കൂ. തൃഷയാണ് അതു ചെയ്യാൻ വിധിക്കപ്പെട്ടത്. ജാനു എന്ന കഥാപാത്രം തൃഷ ഭംഗിയായി ചെയ്തിട്ടുണ്ട്. '96" സിനിമ എനിക്ക് ഒരുപാട് ഇഷ്ടമാണ്.
മഞ്ജുവിനെ മലയാളികൾ ഇത്രമാത്രം സ്നേഹിക്കാൻ കാരണമെന്താണ്?
കാരണമൊന്നും എനിക്കും അറിയില്ല. അതിന്റെ കാരണം അന്വേഷിച്ചു പോവാനുള്ള ധൈര്യമില്ല. ഞാൻ അവതരിപ്പിച്ച കഥാപാത്രങ്ങളോടുള്ള ഇഷ്ടമാവാം. ഒരു സിനിമാതാരമായി പ്രേക്ഷകർ എന്നെ കാണാറില്ലെന്ന് തോന്നിയിട്ടുണ്ട് . അവരുടെ വീട്ടിലെ സ്വന്തം ആള്. ആ സ്നേഹത്തോടെയാണ് പെരുമാറുന്നത്. എവിടെ ചെന്നാലും അവരുടെ സ്നേഹം കിട്ടുന്നു.അത് വലിയ അനുഗ്രഹമാണെന്ന് എനിക്ക് അറിയാം.
സിനിമാ നിർമ്മാണത്തിലും
ഇറങ്ങുകയാണല്ലോ?
സനൽകുമാർ ശശിധരൻ സംവിധാനം ചെയ്ത കയറ്റം ( അഹർ) സിനിമയുടെ മൂന്നു നിർമ്മാതാക്കളിൽ ഒരാളാണ് ഞാൻ.വളരെ ചെറിയ ഒരു ചുവടുവയ്പാണ്. നോക്കാം ....എങ്ങനെയുണ്ടെന്ന്. വലിയ പ്ളാനൊന്നും തത്കാലമില്ല.മഞ്ജു വാര്യർ പ്രൊഡക് ഷൻസ് എന്ന ബാനറിലാണ് 'ശാകുന്തളം" നാടകം തിരുവനന്തപുരത്ത് അവതരിപ്പിച്ചത്.
നാട്ടിൻപുറത്തുകാരിയുടെ നില്പും നടപ്പുമുണ്ട്. എന്നാൽ മോഡേണുമാണ്. എവിടെയാണ് മഞ്ജു സ്വന്തം സ്ഥാനം കണ്ടെത്തുന്നത്?
ഒരേസമയം രണ്ടും ആവുന്നത് നല്ലതല്ലേ?ഒരാൾ നാടനാണെങ്കിൽ മോഡേൺ ആവരുതെന്നും മോഡേണാണെങ്കിൽ നാടൻ ആവാൻ പാടില്ലെന്നും എവിടെയും നിയമമൊന്നുമില്ലല്ലോ. കഥാപാത്രം എന്ത് ആവശ്യപ്പെടുന്നു അതാണ് സിനിമയിൽ കാണുന്ന രൂപം. ചില ദിവസം സാരി ഉടുക്കാൻ തോന്നും. ചില ദിവസം ചുരിദാറോ ജീൻസോ ഇടാൻ തോന്നും. ഏതിലാണോ കംഫർട്ട് ആ വേഷം ധരിക്കാറാണ് പതിവ്.
ഷൂട്ടില്ലാത്ത ദിവസം പുള്ളിലെ വീട്ടിൽ ഒരു ദിവസം എങ്ങനെയാണ്?
അത് അന്നന്നത്തെ സാഹചര്യവും ആവശ്യവും അനുസരിച്ചായിരിക്കും.അല്ലാതെ, പ്രത്യേകിച്ച് ചിട്ടകളൊന്നുമില്ല. ഒഴിവുദിവസം ചെലവഴിക്കാനുള്ള രീതികളൊന്നുമില്ല. എല്ലാം സാധാരണപോലെ തന്നെ. ഞാൻ സാധാരണക്കാരിയാണ്.ഷൂട്ടില്ലാത്ത ദിവസം അമ്പലത്തിൽ പോവാറുണ്ട്.
എപ്പോഴും ലാളിത്യത്തോടെയാണ് സംസാരവും പെരുമാറ്റവും?
അത് ശീലമാണ്.ഞാൻ നിങ്ങളിലൊരാളായാണ് ജീവിക്കുന്നത്. അതു ഉള്ള കാര്യമാണ്. ചോദിച്ചത് കൊണ്ട് പറയുന്നുവെന്ന് മാത്രം.