പല ആരോഗ്യ പ്രശ്നങ്ങൾക്കും പരിഹാരമാണ് തുളസി. നമ്മുടെ വീട്ടുമുറ്റത്ത് തുളസി വളരാറുണ്ടെങ്കിലും ചിലപ്പോൾ അത് പെട്ടെന്ന് തന്നെ കരിഞ്ഞ് പോകുന്നുണ്ടാകും. മുറ്റത്ത് വളരുന്ന തുളസിയിൽ നിന്ന് കുടുബത്തിന്റെ ഐശ്വര്യം മനസ്സിലാക്കാൻ സാധിക്കുമെന്നാണ് പഴമക്കാർ പറയുന്നത്. അതിനാൽ വീട്ടിൽ കരിഞ്ഞ് നിൽക്കുന്ന തുളസിയെ അപകടത്തിന്റെ സൂചനയായിട്ടാണ് കണക്കാക്കുന്നത്. തുളസി കരിഞ്ഞ് പോകാതിരിക്കാൻ പലരും പരമാവധി ശ്രമിക്കാറുണ്ട്. എന്നാൽ കുറച്ച് ശ്രദ്ധ നൽകിയാൽ നല്ല രീതിയിൽ തുളസി വളർന്ന് വരുന്നതാണ്.

• തുളസിയ്ക്ക് സൂര്യപ്രകാശം ആവശ്യമെങ്കിലും നേരിട്ട് സൂര്യപ്രകാശം ലഭിക്കുന്ന രീതിയിൽ ഇത് നടരുത്. നേരിട്ടല്ലാതെ ലഭിക്കുന്ന സൂര്യപ്രകാശമാണ് തുളസി വളരാൻ കൂടുതൽ നല്ലത്.
• ധാരാളം വെള്ളവും തുളസി വളരാൻ അത്യാവശ്യമാണ്. പ്രത്യേകിച്ച് വേനൽക്കാലത്ത് രണ്ട് മൂന്ന് തവണയെങ്കിലും തുളിസിയ്ക്ക് വെള്ളമൊഴിയ്ക്കുന്നത് നന്നായിരിക്കും.
• ജലാംശം നില നിർത്തുന്ന തരത്തിലുള്ള മണ്ണായിരിക്കും തുളസിയുടെ വളർച്ചയ്ക്ക് നല്ലത്. കറുത്ത മണ്ണും കളിമണ്ണും കലർത്തിയ മണ്ണാണ് തുളസി നട്ടുപിടിപ്പിക്കാൻ നല്ലത്. ഇതുപോലെ ഇടയ്ക്കിടെ കടയ്ക്കലെ മണ്ണ് ഇളക്കിയിടുകയും വേണം. തുളസിയ്ക്ക് മഞ്ഞപ്പോ വാട്ടമോ ഉണ്ടെങ്കിൽ കുറച്ച് കുമ്മായം കടയ്ക്കൽ നിന്ന് നീക്കി ഇട്ടു കൊടുക്കാം. മണ്ണിൽ കലർത്തി ഇടുക. ഇത് ബാക്ടീരിയകളെ കൊല്ലാൻ സഹായിക്കുന്നു.
• തുളസിയിൽ ചെറിയ പൂക്കളുണ്ടാകും അത് നുള്ളിയെടുക്കണം. അതായത് തുളസിക്കതിർ നുള്ളിയെടുക്കണം. ഇത് ചെടിയുടെ വളർച്ച വീണ്ടും വർദ്ധിയ്ക്കാൻ സഹായിക്കുന്നു.
• ഒരുപാട് തുളസികൾ ഒരുമിച്ച് നടുന്നത് നല്ലതല്ല. ഇത് ഇവയുടെ വളർച്ച മുരടിപ്പിക്കുന്നു. രണ്ടോ മൂന്നോ ചെടികളിൽ കൂടുതൽ നടരുത്.
• തുളസിയ്ക്ക് ഔഷധഗുണമുള്ളതു കൊണ്ട് ഇതിൽ കീടനാശിനി തളിയ്ക്കേണ്ട ആവശ്യമില്ല. ആവശ്യമെങ്കിൽ നാടൻ രീതിയിലുള്ളവ ഉപയോഗിക്കാവുന്നതാണ്. അല്ലെങ്കിലിത് തുളസിയുടെ ഗുണത്തെ ഇല്ലാതാക്കും. കപ്പലണ്ടിപ്പിണ്ണാക്ക് തുളസിയുടെ വളർച്ചയ്ക്ക് സഹായിക്കുന്ന ഒന്നാണ്. ഇതു കലക്കി കടയ്ക്കൽ ഒഴിച്ചു കൊടുക്കാം.

• പഴത്തൊലി അൽപം വെള്ളത്തിലിട്ട് രണ്ടു മൂന്നു ദിവസം കഴിയുമ്പോൾ ഈ വെള്ളം ഒഴിച്ച് കൊടുക്കുന്നത് ചെടിയുടെ വളർച്ചയെ സഹായിക്കുന്നു.