ന്യൂഡൽഹി: കൊവിഡ് 19​ന്റെ പശ്ചാത്തലത്തിൽ തടവുകാരെ നിബന്ധനകൾക്ക്​ വിധേയമായി വിട്ടയയ്ക്കണമെന്ന സുപ്രീം കോടതി നിർദ്ദേശപ്രകാരം അഞ്ച്​ സംസ്ഥാനങ്ങളിൽ നിന്ന് 23,000 തടവുകാർ ജയിൽ മോചിതരായി.​ 7,200 തടവുകാരെ മോചിപ്പിച്ച മഹാരാഷ്ട്രയും 6,500 പേരെ വിട്ടയച്ച മദ്ധ്യപ്രദേശുമാണ്​ മുന്നിൽ. ഏഴ് വർഷം വരെ തടവുശിക്ഷ ലഭിക്കാവുന്ന കുറ്റങ്ങൾ ചെയ്​ത വിചാരണ തടവുകാരെയും പരോളിലുള്ളവരെയും വിട്ടയയ്ക്കാനാണ്​ കോടതി നിർദേശിച്ചത്​. ഇതുസംബന്ധിച്ച്​ ഉന്നതതല സമിതി രൂപവത്കരിക്കാൻ എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും മാർച്ചിൽ നിർദേശം നൽകിയിരുന്നു.

10,​000ത്തോളം പേരെ മോചിപ്പിക്കാനുള്ള ഒരുക്കത്തിലാണ്​ മഹാരാഷ്ട്ര. രാജ്യത്ത്​ ഏറ്റവും കൂടുതൽ കൊവിഡ്​ കേസുകൾ റിപ്പോർട്ട്​ ചെയ്​ത സംസ്ഥാനമെന്ന നിലയിൽ ജയിലുകളുടെ സുരക്ഷ ഉറപ്പാക്കാനാണിതെന്ന് അധികൃതർ പറഞ്ഞു. ഗുജറാത്തിലെ 28 ജയിലുകളിൽനിന്നായി 2500 തടവുകാരെ വിട്ടയച്ചു. നാല് സ്ത്രീകൾ ഉൾപ്പെടെ 44 തടവുകാർക്ക് ഗോവ സെൻട്രൽ ജയിൽ പരോൾ അനുവദിച്ചു. മറ്റു സംസ്ഥാനങ്ങളും നിരവധി പേർക്ക്​ വിടുതൽ നൽകിയിട്ടുണ്ട്​.