നാരങ്ങ, മാങ്ങ, മീൻ തുടങ്ങി പലതരത്തിലുള്ള അച്ചാറുകൾ നമ്മൾ കഴിച്ചിട്ടുണ്ട്. ഒരു അച്ചാറ് പോലുമില്ലാതെ ചോറ് കഴിക്കുക എന്നത് കുറച്ച് ബുദ്ധിമുട്ടുള്ള കാര്യമാണ്, പ്രത്യേകിച്ച് മലയാളികൾക്ക്. അങ്ങനെയെങ്കിൽ ബീഫ് അച്ചാർ ഒന്ന് പരീക്ഷിച്ച് നോക്കിയാലോ?

ആവശ്യമുളള സാധനങ്ങൾ:

ബീഫ് - അര കിലോ
ഇഞ്ചി - രണ്ട് ടീസ്പൂൺ
വെളുത്തുള്ളി ചതച്ചത് - രണ്ട് ടീസ്പൂൺ
അച്ചാർ പൊടി - നാല് ടേബിൾ സ്പൂൺ
വെള്ളം - ഒരു കപ്പ്
വിനാഗിരി - ഒരു കപ്പ്
പഞ്ചസാര - രണ്ടുനുള്ള്
നല്ലെണ്ണ - ആവശ്യത്തിന്
ഉപ്പ് - ആവശ്യത്തിന്
മഞ്ഞൾ പൊടി - ആവശ്യത്തിന്
മുളക് പൊടി - ആവശ്യത്തിന്
മല്ലിപ്പൊടി - ആവശ്യത്തിന്

തയ്യാറാക്കുന്ന വിധം:

ബീഫ് വൃത്തിയായി കഴുകി ചെറിയ കഷണങ്ങളായി നുറുക്കി വെയ്ക്കുക. മഞ്ഞൾ പൊടി, മുളക് പൊടി, മല്ലിപ്പൊടി എന്നിവ ചേർത്ത് വേവിക്കുക. വെന്ത് കഴിഞ്ഞ് അൽപം ഉപ്പ് ചേർത്ത് നന്നായി വറ്റിച്ചെടുക്കുക.

ഒരു പാനില്‍ നല്ലെണ്ണ ചൂടാക്കി അതിലേക്ക് ബീഫിട്ട് നന്നായി പൊരിച്ചെടുക്കുക. മറ്റൊരു പാനിൽ എണ്ണ ചൂടാക്കി കടുക് പൊട്ടിച്ച് കറിവേപ്പില ചേർത്ത് മൂപ്പിച്ച ശേഷം ഇഞ്ചിയും വെളുത്തുള്ളിയും ചേർത്ത് നന്നായി വഴറ്റുക. ഇതിലേക്ക് അച്ചാർ പൊടി ചേർത്ത് വെള്ളമൊഴിച്ച് തിളപ്പിക്കുക. തിളയ്ക്കുമ്പോൾ വിനാഗിരി ചേർത്ത് ഇളക്കിവെയ്ക്കുക. അതിലേക്ക് ഫ്രൈ ചെയ്ത ഇറച്ചി ചേർക്കുക. നന്നായി കുറകുമ്പോൾ അൽപം പഞ്ചസാര ചേർത്തെടുക്കുക. ബീഫ് അച്ചാർ തയ്യാർ.